Opinas internasional sur la fiasco de Brexit

En la jornal New York Times, Benjamin Mueller scrive: “Britan ia ave nunca un constitui scriveda vera, un fato de alga orgulo per briteses. En cuando americanes disputa sua regulas, la politica brites opera sur un cataloga evoluinte de leges e praticas, arbitrada par la persones regardada como la bones en governa, con sua senti nonfalinte de condui justa.

Ma la fida poplal a acel metodo ia es forte secuteda en esta semana pasada [cuando Boris Johnson, ministro xef, ia suspende la parlamento]. E acel xoca prima ia es segueda par un otra persepi, cisa an plu stonante: cuando algun comensa colpa a via la abituas e costumes cual formi la democratia brites, on ave un cuantia surprendente peti de restrinjes solida e firma a la autoria esecutante.”

En Turcia, la jornal progovernal Sabah vide un declina notable e perilosa en la reputa internasional de Britan. “Con la prosede de Brexit, Britan ia comensa projeta un imaje de un ‘stato nonsusedosa’ en cada respeta,” Bercan Tutar scrive. “La prosede va deveni nonevitable la ruina de Britan.”

Al-Dostour, un jornal dominante en Misre, regarda la Rena Unida como a borda de colasa, avertinte ce la resulta de Brexit va es cisa “la defeta political la plu grande en la istoria de la rena pos la colasa de la Impero Brites”.

Resalat, un jornal noncomprometente en Iran, dise ce la autoriosas scemi per “reversa” la resulta de la vota de 2016, e ce un referendo du ta “leva demandas seria sur democratia en Britan e Europa”.

Plu prosima a la Rena Unida, Irish Times considera la reputa internasional de la pais e demanda: “Cuanto Britan pote cade? La fiasco de Brexit ia lasa ja la pais amarga divideda, sua parlamento paraliseda, sua influe diminuida, e sua reputa fratida.”

En Beljia, la difusor publica flames VRT crede ce “la Rena Unida ia inversa se a caos”. Lo dise ce “tradisiones e acordas esistente tra sentenios deveni abandonada”.

En Espania, on trova un foca a Jibraltar, un teritorio ultramar de Britan. La jornal poplal ABC considera perdes posible per la economia jibraltarian, sitante un reporta governal cual averti sur la efeto de oras plu longa de pausa a la frontera.

Comentor Alain Frachon en Le Monde, jornal franses, dise sur la briteses ce “praticalisme ia es un parte de sua erita nasional – como democratia represental, Wimbledon, e pex con fritadas. En nosa cusines brites, nos ia amira la inversa de nosa pasiones franses,” el ajunta, avertinte contra “la delirio de ideolojia mantenida en un clima de gera interna permanente”.

La jornal sentral destriste Lidové noviny en Txesco demanda: “Cual ia aveni a un pais cual ia es pasada un model per la rena de lege, razona e seticisme sana?”

En Ungaria, Magyar Nemzet, cual suporta Viktor Orban, la ministro xef popliste, declara brusca: “La pex apesta de la testa – on pote resoma la crise cual preocupa Britan tra tre anios en esta frase multe corta.”

La jornal dise ce de 2016 la Rena Unida es trapida. “La politicistes mesma ia gida la popla a un labirinto, ma on ia trova ancora no sorti. La dilema fundal e nonsolvable es ce la popla desira un cosa, e sua representores elejeda desira un otra.”

New Zealand Herald publici un critica picante de la oposores de Boris Johnson par Joer Hildebrand, comentor australian. El denunsia “la disposa scandalosa elitiste ce la popla no ia es sufisinte educada per reconose lo per cual los ia vota en la referendo de 2016, e ce sua era debe es coretida par sua superiores inteletal”.

“An [George] Orwell mesma ta mervelia ce, en Britan de la sentenio 21, politicistes a ci on atribui la luminadia razona ce on debe es permeteda a vota en cualce modo desirada, ma sola si la modo es la coreta.”

Medias en xina burla lo cual los persepi como la “democratia malnomida” de Britan. Huánqiú Shíbào [Tempos Global] asentua asemblas favorente autonomia en Cimri e Scotland, como ance consernas sur Er Norde, per sulini sua punto ce la Rena Unida es vera no unida.

Su la titulo “Adio a impero” en Kommersant, un jornal sur politica e comersia en Rusia, Fiodor Lucianov demanda: “La Sirco Volante de Monty Python no ia atera en Westminster, si?”

El razona: “La sistem de governa elite en la Rena Unida, en cual prosedes democrata ia legali formal la manteni de potia en la manos conveninte, es desintegrante a sua costures. Cisa la xoca de Brexit va furni la reorganiza nesesada per coreti lo. La nasion dise final adio a la impero supra cual la sol ia reposa nunca.”