La trematera la plu forte de desenios en Albania

Laborores de salva atenta trova survivores su la ruinas de construidas en Albania, do un trematera forte ia mata 24 persones e ia feri 650 otras.

La trema de grado 6,4 ia es focada a 34 cilometres a norde-ueste de la capital, Tirana, cuando persones ia dormi en la oras temprana de ier.

La plu de la moris ia aveni en Durrës, un site costal, e la vila Thumanë, prosima a la episentro. Sentos de persones ia pasa la note en tendas o en autos, entre plu replicas sismica.

Edi Rama, ministro xef, ia promete ce salvores va “continua xerca pasiente e completa asta la fini”. La governa ia declara oji como un dia de lamenta.

La Comision European ia envia ecipos de salvores de Italia, Elas e Romania per aida con la xerca, e ecipos ia veni ance de Cosovo e Montenegro.

La Balcanes es un rejion propensada a tremateras, ma esta es la plu forte en Albania en desenios. Lo ia aveni a 03:54 de ora local e ia es segueda par 250 replicas potiosa a la min.

En Thumanë, un tore de sinco niveles de apartes ia colasa. Un om en sua desenio ses ia parla sur sua teme ce sua madre de 70 anios e sua sobrina de ses anios es trapida a interna: los ia abita sur la nivel la plu alta.

Un person de 24 anios ia es estraeda, vivente, pos la noti ier. Ma un fem de 30 anios ia mori a alga oras pos es estraeda. Sua fia ia mori su la detrito.

Alga de la persones mor es de Cosovo, pais visina, cual oserva ance un dia nasional de lamenta oji.

Un om ia es matada en un asidente de auto cuando la trema ia rompe la partes de un strada. Un otra ia mori pos salta panicante de un fenetra.

Doman es la aniversario de la autonomi de Albania de la Impero Osmanan en 1912, ma on ia cansela aora tota la selebras pertinente.