La subasta recordo de un depinta trovada en un cosina

Un depinta par un artiste famosa italian, longa perdeda ma trovada en la cosina de un fem vea franses, ia es subastada per 24 milion euros, creante un recordo nova per un depinta medieval.

Cristo Burlada par Cimabue, un artiste prerenasal, ia es descovreda en Frans norde en la mense pasada. On ia predise ce lo va es vendeda per asta ses milion euros, ma la ofre ganiante ia esede vasta la espeta: la depinta ia es vendeda a un compror anonim de Frans norde per la cuatruple de sua cuantia estimada.

“Cuando un obra unica de un depintor tan rara como Cimabue veni a la mercato, on debe es preparada per surprendes,” la subastor Dominique Le Coent ia dise.

Tra anios, la depinta ia pende supra un stufa en un cosina en la site Compiègne. Lo ia es notada par un subastor ci ia consela sua posesor a oteni un evalua esperta. La posesor ia crede ce lo es un icon relijial vea con poca valua.

On ia fa probas a la obra, usante lus infraroja per determina sua similia con otra obras par la depintor italian Cimabue, ance conoseda como Cenni di Pepo.

Naseda en la site Firenze, el ia es ativa en la tarda de la sentenio 13 e la temprana de la sentenio 14. El ia es un figur traversante entre la arte stilida de la periodo medieval e la obras plu naturin de la Renase.

La obra vendeda es pico, con dimensiones de sola 20 × 26 sentimetres. On crede ce lo es un parte de un poliptico - un obra plu grande de senas depintada, divideda entre du o plu paneles - con data de 1280, mostrante la sufri e crusi de Cristo.

Du otra senas de la mesma serie par Cimabue pote es regardada a la Galeria Nasional en London e la Colie Frick en New York. La obras de esta artiste ia es xef influeda par arte bizantian, produida sur paneles de poplo con fondos de pinta de oro.