La polisia ataca en la metro de Hongkong pos protestas

En Hongkong, la polisia ia ataca violente protestores suspetada cuando miles ia marxa en la site, defiante un proibi. Imajes mostra polisiores ci colpa persones con bastones e usa gas de peper en un tren en la metro.

La polisia dise ce los ia es clamada a un sena de violentia contra sitadanes par “protestores revoluinte”. Ma lo no es clar esce tota la persones ferida e arestada en la metro ia es envolveda en protestas.

Miles de persones ia vade sur la stradas ier, per refleta la aniversario sinco de cuando la governa de Xina ia proibi elejes intera democrata en Hongkong.

Protestores ia ensende focos, ia lansa bombas de gasolina, e ia ataca la construida de parlamento. En responde, la polisia ia usa gas lacrimojen, baletas de cauxo e canones de acua per sperde la fola, e ia xuta baletas avertinte en cuando los ia atenta vacui la stradas.

La protestas la plu resente ia aveni a la dia pos la aresta de alga ativistes e legores ci suporta democratia en esta rejion spesial manejada de Xina. Aora, Hongkong ia esperia un serie de 13 semanas de protestas.

La promove ia crese de asemblas contra un projeta controversa de estradi (aora suspendeda) cual ta permete ce on envia criminales suspetada a la tera xef de Xina per es litigada. Lo ia deveni un promove plu vasta per democratia, en cual la scaramuxas ia deveni plu violente.

En la protestas, un fola de persones ia asembla prosima a la stasiones Prinse Edward e Mong Kok en la distrito Kowloon. La polisia ia tuita ce los ia responde a ambos locas pos reportas de protestores revoluinte ci ataca sitadanes e dana imobilas.

En un declara formal, la governa de Hongkong ia dise ance ce alga protestores ia fa ensendes criminal e ia “lansa ojetos diversa e reles de fero” sur ferovias, “completa iniorante la securia de otra pasajores”. 40 persones ia es arestada per asemblas nonlegal, danas criminal, e atacas contra polisiores.

Ma alga persones ia cexa sur la fortia esedente cual la polisia ia usa. Un om ia raconta: “La tren ia para. Polisiores ia entra e ia colpa me a du veses con un baston. Los no ia aresta me. Mera, los ia relasa sua coleria par colpa me.”

La compania MTR, cual opera la metro de Hongkong, ia dise ce lo ia clui tre stasiones pos la aveni. On no sabe cuando los va reabri.

Protestores ia vade sur la stradas en la distrito Wan Chai, do multe ia junta se a un marxa cristian, e otras ia protesta su pluve intensa en Causeway Bay, un distrito de botecas. Multe ia porta parapluves e mascas de fas.

Protestores cantante “sta con Hongkong” e “batalia per libria” ia asembla estra ofisias governal, la xeferia local de la Armada Poplal de Libri e la parlamento de la site, nomida la Consilio Leginte.

En la distrito Admiralty, alga protestores ia lansa bombas ensendente en dirije a polisiores. Plu temprana, protestores ia marxa prosima a la abiteria ofisial de Carrie Lam, la dirijor xef de Hongkong ci es la foca de multe de la coleria.

Polisiores de tumulta ia erije paradores sirca construidas major, e ia xuta gas lacrimojen e jetas de acua con tinje blu. Esta licuida colorida es tradisional usada per fasili identifia protestores a pos.

La polisia ia confirma ce du polisiores ia spara a la aira en sua opera de move la protestores de la stradas. Cada de la du ia xuta un baleta cuando el ia senti ce sua vive es menasada.

Un studiante de 22 anios ia dise: “Comanda nos a sesa protesta es simil a comanda nos a sesa respira. Me senti ce batalia per democratia es mea debe. Cisa nos vinse, cisa nos perde, ma nos batalia.”