La Bahamas es bateda par un tempesta estrema

La Bahamas ia es colpada par la tempesta la plu potiosa en istoria rejistrada. Lo ia sutrae tetos de construidas e ia causa inondas grave.

La tempesta Dorian move lenta, ma lo trae ventas sustada de asta 285 cilometres per ora. Entre siclones atlantica rejistrada, lo es la numero du de la plu fortes.

On predise ce la mar va leva par 7 metres en alga locas, menasante vives.

La siclon move a ueste e va colpa cisa partes de la costa este de la SUA, do la statos Florida, Georgia, e Carolina Norde e Sude ia declara un state de crise.

A 03:00 de ora universal, Dorian ia es a la borda este de la isola Bahama Grande, pos traversa plu temprana la Isolas Abaco, pico a este.

Ambos es en la norde de la arcipelago Bahamas en la Caribe. Bahama Grande es a sola 100 cilometres a este de la site West Palm Beach en Florida.

Poca informas ia es resetada de la Bahamas en la note, par causa de rompes de eletrica e funsionas limitada de la interede.

On ia reporta ce la Isolas Abaco es inondada, con acua tan profonda como un auto, e casas sin tetos.

Ventas alta e pluve deluvial ia afeta ance Bahama Grande. Abitores ia posta videos mostrante acua inondante alga casas, e barcos inversada flotante en inondas plen de detrito.

La governa ia abri 15 refujerias, e ia pone deses de eglesas, scolas e otra construidas en sua listas ofisial de refujerias ofisial.

Ma on ave un ansia ce, cuando esta locas deveni plen, persones va es obligada a refuja se en otra locas cual no es listada per reseta comeda e acua de la governa.

La Bahamas es un de la paises la plu frecuente colpada par siclones, e casas nesesa es fortida per tolera la ventas de un tempesta de categoria cuatro. La siclon presente es de categoria sinco.

Hubert Minnis, ministro xef, ia anunsia un comanda de evacua per partes de Bahama Grande e la Isolas Abaco. On ia demanda ce tota turistes parti. Ofisiores ia espresa sua angusa ce alga persones ia eleje resta.

Minnis ia dise, vidable turbada: “Me espera ce esta no es la ves final cuando los va oia mea vose. Ta ce Dio es con los. Esta es probable la dia la plu triste e mal de mea vive. Nos fasa un siclon cual nos ia vide nunca en la istoria de la Bahamas.”