La Amazona arde

Miles de focones es destruinte la Foresta Amazona en Brasil. La focones es la plu intensa de cuasi un desenio.

La statos norde Roraima, Acre, Rondônia e Amazonas, como ance Mato Grosso do Sul, es spesial grave afetada.

Ma alga imajes de la focones cual on distribui, incluinte alga compartida con la eticeta #PreaPerAmazona, veni de desenios pasada o no ia es an en Brasil.

La Instituida Nasional per Rexerca Spasial en Brasil dise ce sua datos de satelite indica un crese par 85% de la cuantia de focones contra la mesma periodo en 2018.

La statistica ofisial ia rejistra plu ca 75 mil focones de foresta en la pais en la oto menses prima de esta anio.

Focones de foresta aveni comun en la Amazona en la saison seca, cual estende de julio asta otobre. Los pote es causada par fenomenos natural, como colpas de lampo, ma ance par cultivores e leniores ci vacui la tera per gran o pasto.

Ativistes dise ce la retorica antiambiental de Jair Bolsonaro, presidente de Brasil, ia coraji tal sutraes de arbores.

Respondente, Bolsonaro, ci es ja longa setica a tema de clima, ia acusa organizas nongovernal de comensa mesma la focones per dana la reputa de sua governa. El ia dise plu tarda ce la governa no ave la recursos nesesada per combate la flamas.

Amazonas, la stato la plu grande de la pais, ia declara un state de crise.

Plumones de fuma estende tra e ultra la rejion Amazona. On reporta ce la fuma viaja asta la costa atlantica, e ce lo ia oscuri an la sielo en São Paulo a distantia de plu ca 3200 cilometres.

La focones relasa multe diosido de carbono, corespondente a 228 megatones en esta anio, diseda par la Servi Copernicus de Monitori la Atmosfera (CAMS). Esta es la cuantia la plu alta pos 2010.

Los emete ance monosido de carbono, un gas relasada cuando lenio arde en un ambiente de poca osijen. Mapas de CAMS mostra la viaja de esta gas, cual es nosiva en cuantias grande, a ultra la costas de America Sude.

La Basin Amazona conteni sirca tre milion spesies de plantas e animales, e milion persones nativa. Lo es un fator esensal en freni la caldi global, car sua forestas asorbe miliones de tones de carbono emeteda en cada anio.

Ma cuando un arbor es taliada o ardeda, la carbono contenida deveni librida a la atmosfera, e la capasia jeneral de la foresta per asorbe plu emetes de carbono deveni reduida.

La presidente de Frans, Emmanuel Macron, ia dise ce la situa en la Amazona es un crise internasional cual debe domina la discutes a la confere de la G7 en Biarritz a esta fini de semana.

Bolsonaro ia responde ce Macron usa la crise per gania political, disente ce el evoca “un disposa de mente colonial e malponeda”. Brasil no partisipa a Biarritz.