Indicas suprabundante per acusa Trump

La comite cual gida la investiga sur la posiblia de acusa Donald Trump, presidente de la SUA, per mal condui en sua posto ia dise ce la indicas contra el es “suprabundante”.

En un reporta major a la legores, lo declara ce la presidente ia pone sua propre interesas political personal “supra la interesas nasional de la Statos Unida”. Lo dise ce el ia atenta “solisita interfere stranjer” de Ucraina per aida sua aspira per es reelejeda en 2020.

Trump nega tota mal condui e ia descrive la investiga par la Partito Democrata como un xasa de sorsores. Ante la publici de la reporta, la presidente republiciste ia ataca lo como “multe nonpatriota”.

Pos la publici, Stephanie Grisham, la secretor jornaliste de la Casa Blanca, ia dise ce la Democratas ia “fali intera produi cualce indica de malcondui” e ce la reporta “refleta no cosa plu ca sua frustras”.

La cosa pasa aora a la Comite Judal, cual va comensa oji sua labora de considera acusa formal Trump.

La reporta dise ce la investiga “ia descovre un atenta tra menses par Presidente Trump per usa la potias de sua posto per solisita interfere stranjer per sua benefica en la eleje de 2020”.

Lo dise: “La scema de Presidente Trump ia suverti la politica esterna de la SUA a Ucraina, e ia sumina nosa securia nasional en favore a du investigas political motivada cual ta aida sua campania de reeleje presidental.”

“La presidente ia esije ce la Presidente Ucrainsce nova elejeda, Volodymyr Zelensky, anunsia publica investigas sur un competor political ci, parente, el ia teme la plu – la vispresidente pasada Joe Biden – e sur un teoria contradiseda ce lo es Ucraina, e no Rusia, cual ia interfere en la eleje presidental de 2016.”

La reporta dise ce no sola la indicas de mal condui es suprabundante, ma “ance la indicas de sua impedi de la Congresa” (la parlamento).

Ier, par 13 votas contra 9, seguente la partitos, la comite de securia ia deside aproba la reporta e envia lo a la Comite Judal.

La escutas de la comite va comensa con cuatro eruditas sur la constitui, ci va esplica la prosede de acusa un presidente. La Casa Blanca ia refusa partisipa, referente a un manca de “justia”.

Entre la acusas formal per cual on previde consideras es la malusa de potia, la impedi de justia, e la despeta de la Congresa.

La Democratas desira ce la Salon Basa fa un vota sur acusa Trump ante la fini de la anio, previdente un litiga en la Salon Alta cisa tan temprana como en janero.