Gas lacrimojen es usada contra protestores en Hongkong

En Hongkong, polisiores ia relasa gas lacrimojen e ia usa bastones per ataca protestores, cuando un nonprogresa tensada ia deveni violente en la semana des-du de protestas ala.

Miles de protestores, con multe en xapos protejente e mascas de gas, ia marxa tra la rejion industrial Kwun Tong a saturdi e ia es encontrada par polisiores. Alga protestores ia xuta petras de fondetas, provocante la polisia a ataca.

A saturdi, la protestores ia fronti la polisia tra alga oras estra un polisieria en Kwun Tong, pos construi ostaculos con palos de bambu e paradores de trafica.

Los ia esije la sutrae de palos intelijente, sur cual la autoriosas dise ce los es sola presente per mesura la cualia de la aira. Protestores teme ce los ta deveni usada per monitori xines, incluinte par tecnolojia de reconose fases.

La nonprogresa ia fini cuando alga protestores ia lansa brices e botelas de acua a la polisiores, ci ia responde par core per ataca e par bate alga de la protestores. La polisiores ia deteni alga de los.

La violentia ia rompe un pas noncuieta cual ia esiste tra pico plu ca un semana. Sentos de miles de persones ia marxa nonviolente en la soldi pasada, cuando protestores ia xerca condui moral plu bon ca la polisia.

La protestas ia es provocada par un projeta legal de estradi, aora suspendeda, cual ta permete Hongkong a envia criminores suspetada a Xina per litiga. Ma los ia crese a un promove plu vasta cual urje un reformi democrata en la teritorio e un investiga de cruelia alegada de polisiores contra protestores.

En la soldi pasada, diseda par organizores, sirca 1,7 milion persones ia asembla en la sentro de Hongkong per suporta la democratia. La polisia ia sujesta un cuantia multe min alta, sirca 128 mil, contante sola los a un asembla ofisial permeteda en la Parce Victoria.

On ia fa ja protestas a la Airoporto Internasional de Hongkong e ance a locas de turisme en la site.

A venerdi, YouTube ia anunsia ce lo ia clui plu ca 200 canales, disente ce los ia parteni a un atenta xines “coordinada” per posta malinforma sur la protestas.

Facebook e Twitter ia dise a lundi ce los ia ata per bloci lo cual los ia descrive como un campania governal suportada de malinforma en redes sosial. Twitter ia sutrae 936 contas, comentante ce los ia es usada per “sperde desacorda political en Hongkong”.