Dirijores de Fukushima es judida como nonculpable

A plu ca oto anios pos la desastre nucleal a Fukushima, un corte japanes ia desculpa tre dirijores pasada de la compania operante la compleso sur acusas de descura profesal.

Esta ia es la sola caso criminal cual ia veni de la desastre, la plu mal pos Txernobil en 1986.

En 2011, un compleso operada par TEPCO ia es colpada par un tsunami, causante un fonde truple. Plu ca 470 mil persones ia es evacuada de sua casas en resulta, e cuasi 18 500 ia mori o manca par causas plu jeneral de la desastre.

La tre dirijores – Tsunehisa Katsumata, la presidente pasada, ci ave 77 anios, e la vispresidentes Sakae Muto, de 66 anios, e Ichiro Takekuro, de 71 – ia es acusada de fali reali taticas defendente, gidante a la moris de 44 persones.

An si nun ia mori direta en la fonde nucleal, plu ca 40 pasientes ospitalida ia mori pos cuando on ia freta los de la zona evacuada. Des-tre persones ia es ance ferida en esplodes de idrojen a la compleso.

En sua judi multe espetada, un corte en Tokyo ia deside ce tota tre omes es nonculpable de descura profesal causante moris e feris. Los ia ta es punida con sinco anios en prison si on ia ta condena los.

La acusores ia reclama ce, an tan temprana como 2002, la xefes ia es avertida ce un tsunami grande de plu ca 15 metres ta pote colpa la compleso, ma ce los ia eleje iniora la informa e no ia forti sua defendes.

Desuples de protestores ia asembla estra la corte ante la anunsia. Un de los, ci ia viaja de la rejion Fukushima, ia comenta: “Si nos no oia judis condenante, nosa laboras tra anios per trae esta a la corte no va es recompensada. E la cultur de la sosia japanes, ce nun aseta la culpablia, va continua.”

A du veses, acusores ia refusa ja litiga formal la dirijores pasada, disente ce on ave poca posiblia de susede. Ma un comite judal ia deside a contra, obligante los a partisipa. La litiga ia comensa en junio 2017.

La asidente ia provoca un descomuta completa de tota reatadores nucleal en la pais. An con un opina vastida contra los, alga reatadores ia recomensa sua opera, pos pasa tra esaminas spesial de securia.

La compania TEPCO fasa alga casos legal cual xerca compensa sur la desastre, car alga laborores ia deveni malada pos relimpi la compleso en Fukushima.