AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
17 agosto 2019
Gronland ia dise ce lo es “no per vende” pos un sujesta ce Donald Trump ia dise ce la SUA desira compra la isola.
La Wall Street Journal ia reporta ce, a comes e consentas con sua conselores, la presidente esuan ia discute la idea de compra Gronland, un teritorio autonom dansce, ance nomida Calalitnunat.
Ma la governa gronlandes ia refusa la idea, disente: “Gronland es rica con recursos valuada como minerales, acua e jelo la plu pur, reservas de pexes, comedas de mar, e enerjia renovable, e es un frontera nova per turisme aventurosa. Nos es abrida per comersia, no per vende.”
La idea ia es ance rapida rejetada par politicistes en Danmarc. Lars Løkke Rasmussen, ministro xef pasada, ia tuita: “Lo es probable un broma de la prima de april, ma intera estra la saison!”
La WSJ ia indica ce Trump ia parla sur la compra con “grados variante de seria”. Fontes sitada en otra jornales ia desacorda sur esce la presidente broma o espera vera crese la teritorio de la SUA.
Poul Krarup, editor xef de la jornal Sermitsiaq, ia dise ce el no pote crede la comentas par Trump. “Gronland es un rejion autonom en la rena dansce e debe tal es respetada. Nos ta desira coopera con la SUA, esta es sin duta, ma nos es nondependente e nos deside ci es nosa amis.”
Søren Espersen, portavose per la Partito de la Popla Dansce, ia comenta: “Si el contempla vera esta, alora esta es la demostra final ce el ia deveni loco. La pensa ce Danmarc ta vende 50 mil sitadanes a la Statos Unida es completa riable.”
E Rasmus Jarlov, un parlamentor dansce conservaliste, ia scrive en Twitter: “De tota cosas cual no va aveni, esta es la plu nonprobable. Oblida lo.”
Trump va visita Danmarc en setembre, ma on ave no indica ce la compra de Gronland es a la menu.
Gronland es la isola la plu grande de mundo (estra Australia, cual on defini como un continente). Lo es locada entre la Mar Atlantica Norde e la Mar Artica.
Lo ave un popla de sirca 56 mil persones, consentrada a la costa, de ci cuasi 90% es inuites nativa. Lo ave un autonomia limitada e sua propre parlamento.
Plu ca 80% de la isola es covreda par un glasia, sur cual on teme ce lo fonde par causa de la caldi global.
La fonde de jelo ia fa ce la recursos mineral de la isola deveni plu asedable. Ma on crede ce lo va esposa ance dejetadas radioativa lasada a alga stasiones militar esuan en la Gera Fria.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).