AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
13 desembre 2019
En la Rena Unida, la Conservalistes de Boris Johnson ia fa un vinse inondante en la vota jeneral tre en min ca sinco anios.
Los ocupa aora sirca 55% de la sejas en la parlamento de London, pos gania en multe locas en Cimri e la norde de England cual ia vota tradisional per la Partito de Labora.
Johnson ia dise ce la resulta va permete ce el reali Brexit, e ce la Rena va sorti de la Uni European a la fini de janero. La Conservalistes va ave sua majoria la plu grande de sejas en parlamento pos la vinse de Margaret Thatcher en 1987.
Jeremy Corbyn, xef de la Partito de Labora, ia descrive la resulta como “multe deludente”. El va resta en sua posto per la tempo de considera cual veni aora a sua partito, ma el va resinia a pos.
La Partito Nasional Scotes ia vinse ance, ocupante aora 48 de la 59 sejas scotes en la parlamento de London.
Nicola Sturgeon, ministro prima de Scotland e xef de acel partito, ia comenta ce sua pais ia envia “un mesaje multe clar” ce lo no desira un governa Conservaliste su Johnson, e ce la resulta no autori la sorti de Scotland de la UE ma suporta ce Scotland eleje sua propre futur en un referendo de autonomia.
Jo Swinson, ci ia deveni mera resente la xef de la Democratas Liberaliste e ia comensa sua campania par dise ce el intende deveni la ministro xef, ia perde sua seja en Scotland par sola 149 votas.
La Partito de Labora ia esperia sua defeta la plu profonda pos 1935. Notable, lo ia perde sejas representante comunias cual ia vota per sorti de la UE en la referendo de 2016.
Analises de la statistica sujesta ce Brexit ia es la fator dominante en la mentes de la votores. Divides forte de opina entre parlamentores ia stania la prosede de sorti de la UE, e la pais ia deveni tan fatigada par la nonprogresa eterna ce multe persones ia prefere vota an contra sua tradision.
Ma ance la nonpopularia de Corbyn, e sua politica de fa un plu referendo sur Brexit, ia contribui a la move de la votores a via de Labora.
La stratejia de Johnson ia es un foca sin sesa a un sola mesaje – la completi de Brexit. Corbyn ia campania sur temas plu diversa, prometente spende plu per servis publica incluinte la Servi Nasional de Sania.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).