Acusas de crimines contra diretos umana en Txile

La Nasiones Unida ia acusa ce la polisia e fortes armada de Txile ia fa violes major de diretos umana en sua responde a protestas coletiva resente.

Investigores dise ce los ia confirma cuatro casos de moris nonlegal cual ia envolve ajentes de stato. Sua reporta nota ce 345 persones ia sufri trauma de oios par causa de pistoles de aira, e asentua ance tortura e violentia sesal.

De la 28 mil persones detenida pos la media de otobre per litiga, sirca 1600 persones resta tal.

La protestores esije reformis sosial e cambias a un constitui cual ia orijina en 1980, en la eda predemocratial, cuando la pais ia es ancora su la rena militar de Augusto Pinochet. A la min 26 persones ia es matada e sentos ia es ferida en la tumultas.

La reporta par la ofisia NU per diretos umana ia dise ce on disputa la statistica txilan ofisial de plu ca 4900 persones ferida, car otra fontes ofre estimas multe plu alta.

La ecipo de la NU ia documenti 113 casos spesifada de tortura e mal trata, e 24 casos de violentia sesal contra femes, omes e adolesentes, par membros de la polisia e armada.

Lo ia nota “la usa nonesesada e nonproportial de armas min matante” como fusiles antitumultal e gas lacrimojen. La xef de la investigores ia comenta: “Nos ia trova ce la maneja jeneral de asemblas par la polisia ia es realida en manera fundal represante.”

La protestas ia es provocada par un anunsia ce la custa de transporta publica va leva en la capital, Santiago. Los ia sperde rapida tra la pais e ia deveni un revolta jeneral contra nonegalia, la custa alta de aida medical, e la finansia basa de educa.

Represa sever par la fortes de securia ia tisa plu la coleria de la protestores, como ance la responde par Presidente Sebastián Piñera, ci ia declara un state de crise e ia dise ce la pais es “en gera”.