1,9 milion baratis es escluida de la lista de sitadanes

Barat ia publici la varia final de un lista cual, en efeto, sutrae la sitadania de sirca 1,9 milion persones en la stato norde-este Assam.

La Rejistra Nasional de Sitadanes es un lista de persones ci pote demostra ce los ia veni a la stato ante la fini de 24 marto 1971, la dia ante cuando Bangladex, pais visina, ia declara sua autonomia de Pacistan.

Persones no en la lista va ave 120 dias per apela contra sui esclui. Lo cual on intende fa a pos no es clar.

Barat dise ce la prosede es nesesada per identifia migrores bangla nonlegal. Lo ia deteni ja miles de persones suspetada de es stranjeres, en campas tempora en la prisones nasional, ma la deporta no es un eleje posible per la pais a presente.

La prosede ia provoca ance critica de “xasas de sorsores” contra la minorias etnical de Assam.

Un varia ru de la lista, publicida en la anio pasada, ia esclui cuatro milion persones.

La Rejistra Nasional ia es creada en 1951 per determina ci ia nase en Assam e es donce barati, e ci es cisa un migror de Bangladex. On renovi aora la lista a la ves prima.

Familias en la stato ia debe furni documentos per mostra sua linia de desende. Los ci no pote demostra sua sitadania es regardada como stranjeres nonlegal.

La partito de Narendra Modi, ministro xef, ia cexa longa contra migra nonlegal en Barat, e ia asentua la renovi de la Rejistra Nasional en anios resente.

Assam es un de la statos barati la plu multietnical. Demandas de identia e sitadania turba ja longa un cuantia vasta de persones ci abita ala.

Entre sua abitores es indus bangla e asames, como ance membros de tribus diversa. Un tri de la 32 milion abitores de la stato es muslim, la cuantia la plu alta estra la parte barati de Caxmir. Multe es desendentes de migrores ci ia comensa abita ala su la rena brites.

Ma la migra nonlegal de Bangladex, cual ave un frontera de 4000 cilometres con Barat, es un conserna tra desenios. En 2016, la governa ia estima ce 20 milion migrores nonlegal abita en Barat.