AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

14 marinores mori en un sumarina rusce

3 julio 2019

Un focon en un barcon sumerjable rexercante de la marina rusce ia mata 14 ecipores. Los ia es venenida par vapor nosiva cuando los ia fa mesuras en acuas teritorial de Rusia en lundi.

La ministreria de defende ia furni no detalias sur la tipo de barcon, ma on reporta ce lo ia es un minisumarina nucleal, usada per operas spesial.

Ultima, on ia estingui la focon, e la barcon es aora a Severomorsk, la base xef de la Flotila Norde Rusce.

On no ia revela cuanto persones ia es en la ecipo a la tempo de la asidente. Reportas en jornales local dise ce alga ecipores ia es ferida e ospitalida.

La comandor xef de la marina ia inisia un investiga.

Ier, Vladimir Putin, presidente de Rusce, ia retira se de un aveni ajendida en la rejion Tver, a norde-ueste de Moscva, per discute la asidente con Sergei Shoigu, ministro de defende.

Putin ia descrive la asidente como un perde grande per la marina rusce, e ia espresa compatia a la familias de la vitimes. El ia dise ance ce sete capitanes e du empleadas portante la titulo onorosa la plu alta, Eroe de la Federa Rusce, ia es entre los ci ia mori.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).