AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Suiz fa un referendo sur la revenu fundal

5 junio 2016

Suiz vota sur un proposa de introdui un revenu fundal garantiada per cada sitadan. Lo deveni la pais prima cual fa un tal referendo.

On proposa paia a adultes un revenu nonrestrinjeda de 2500 frances suiz ($2555) per mense, o si los labora o si no.

Suportores de la idea dise ce la labora en la sentenio 21 es sempre plu automatida, e ce min postos es disponable per laborores. Ma sondas sujestas ce sola un cuatri de votores suiz aproba la idea.

Su la defini de la revenu fundal, laborores ci gania ja plu ca 2500 frances no ta reseta plu mone.

On vide poca suporta per la idea entre la politicistes de Suiz, e an no un partito parlamental ia declara se como favorente lo.

La oposores razona ce un deslia de la mone ganiada de la labora fada ta es un mal paso per la sosia.

Ma Che Wagner de la grupo campaniante Revenu Fundal Suiz dise ce lo no ta es un paia per no cosa. “En Suiz, plu ca 50% de tota la laboras fada es nonpaiada. Los es laboras de cura, los es a casa, los es en comunias diversa, tal ce la laboras ta es plu valuada con un revenu fundal.”

Luzi Stamm, un parlamentor destriste per la Partito de la Popla Suiz, oposa la idea. “Teorial, si Suiz ta es un isola, la responde ta es «si». Ma con fronteras abrida, lo es completa nonposible, spesial per Suiz, con un norma alta de vive. Si on ta ofre a cada individua un cuantia de mone suiz, on ta ave biliones de persones ci ta atenta move a Suiz.”

On esplora la idea ance en otra paises. En Finland, la governa considera un periodo probante de dona un revenu fundal a sirca 8000 persones de grupos de revenu basa.

E en la site nederlandes Utrecht, on developa ance un projeta esperimental cual va comensa en janero 2017.

La revenu fundal es oji un de sinco temas sur la paper de vota suiz. On vota ance sur la finansia de servis publica e sur un simpli de la metodo per xerca refuja.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).