Shimon Peres mori

Shimon Peres ia mori a la eda de 93 anios. El ia servi a du veses como la ministro xef de Israel e a un ves como la presidente.

El ia sufri un ataca serebral a du semanas ante aora. Sua state ia boni ante un mali subita ier.

Sua fio Chemi ia gida tribuis a “un de la padres fundinte de la stato Israel” ci “ia labora nonfatigable” per lo.

Peres ia es un de la ultimas de un jenera de politicistes israeli presente a la nase de la nasion nova en 1948.

El ia gania la Premio Nobel de pas en 1994 per sua rol en negosia acordas de pas con la filastinis en la anio presedente. El ia dise ce la filastinis es la “visinas la plu prosima” de Israel e ta pote deveni sua “amis la plu prosima”.

Peres ia mori en un ospital prosima a Tel Aviv en la temprana de esta matina, con sua familia a lado de sua leto. El ia es ja en la unia de cura intensa de la Sentro Medical Sheba pos un ataca serebral major a 13 setembre.

Benjamin Netanyahu, la ministro xef de Israel, ia espresa sua “tristia personal profonda sur la mori de la presidente pasada e amada de la nasion”.

En un declara, Barack Obama, la presidente de la SUA, ia nomi Peres sua “ami cara”, comentante: “El ia es gidada par un imajina de la dinia e progresa cual, el ia sabe, persones bonvolente ta pote avansa juntada.”

Ephraim Mirvis, la rabi xef de Britan, ia descrive Peres como “un jigante vera entre umanas” e “la esemplo vivente la plu grande de un crede nonmovable a la xerca de pas an contra tota. Trajedial, asta aora, nos no ia susede. Ma de Shimon Peres nos ia aprende ce nos debe nunca desteni acel promete corajosa a pas, an cuando tota la mundo sirca nos vole fa tal.”

Peres ia divide sua Premio Nobel de pas con la ministro xef Yitzhak Rabin, ci ia es asasinada a tempo plu tarda, e la xef filastini Yasser Arafat.

A la comensa de sua carera political longa, on ia encarga el con organiza de empleadas e compra de armas per la Haganah, la presedente de la Fortes de Defende de Israel.

El ia negosia un acorda con Frans afin la nasion israeli nova ta es furnida con jetos xasante Mirage. El ia institui ance la compleso nucleal secreta de Israel.

El ia es la ministro de defende en 1976, cuando saisores filastini ia diverje un avion de Israel a Entebbe en Uganda. El ia supravide la salva susedosa de plu ca 100 ostajes.

Inisial un promovor de colonias iudi a la Riva Ueste ocupada, Peres ia deveni plu tarda un simbol political major de pas. El ia parla a multe veses sur la nesesa de compromete sur esijes teritorial en areas filastini.

El ia manteni un program ativa de apares publica an en sua senese, xef en contesto de sua organiza nongovernal, la Sentro Peres per Pas, cual promove lias plu prosima entre israelis e filastinis.

En 2013 el ia dise: “On ave no alternativa de pas. La vade a gera es nonrazonante.”

El ia retira se de sua rol como presidente de la pais en 2014.

Sua funera va aveni a venerdi a Monte Herzl, la semetero nasional de Israel en Ieruxalim. Sua caxon va es locada a la parlamento a jovedi afin la popla pote ofre respeta.