AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

On investiga un crimin posible par monces arjentina

21 julio 2016

La eglesa roman catolica en Arjentina ia comensa un investiga sur esce cuatro monces fema ia aida asconde un cumula de mone e joalas.

La investigor xef, Tom O’Donnell, ia dise ce on atenta descovre esce un crimin contra la leges eglesal ia aveni.

En junio, un ministro pasada de governa ia es arestada estra la monceria. On alega ce el ia atenta asconde cuasi $9 milion de joalas e mone fisical.

La monceria es la comunia de Nosa Dama de Rosaria de Fátima, situada a sirca 55 cilometres a ueste de la capital, Buenos Aires. Monces fema laborante ala ia clama la polisia pos vide un om jetante sacos plastica a ultra un mur.

On alega ce el es José López, ci ia es la ministro de infrastrutur en la governa de Cristina Fernández de Kirchner.

Resente en Arjentina, on ia publici imajes de camera vijilante sur cual on alega ce los mostra López portante la sacos, conteninte joalas e faxas de biletas de mones diversa, a en la monceria, aidada par du monces.

On dise ce cuatro monces ia aida el en soma. Un de los va apare ante un judor en la mense veninte.

De pos la emprende de la posto de presidente par Mauricio Macri en la parte plu temprana de esta anio, on ia fa un serie de investigas de ofisiores pasada sur la tema de lava de mone.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).