La Pilipinas gania un presidente nonortodox

Rodrigo “Digong” Duterte, la aspiror nonortodox anticrimin, ia vinse en la eleje presidental en la Pilipinas, pos la retira de sua oposores.

An si la resulta ofisial es ancora no declarada, sua oposor xef, Mar Roxas, ia confesa sua defeta cuando la sondas ia dona un vantaje nonatacable a Duterte.

Duterte ia dise ce el aseta la autoria con “umilia estrema”.

La om de 71 anios ia tisa controversia con comentas ensendente en sua campania.

El ia atribui sua susede a sua disposa forte sur lege e ordina. Sua condui como la maior anticrimin de Davao, un vila sude cual ia es malfamosa a ves pasada per sua criminosia, ia gania a el la nometa “La Punor” e ia resona bon con votores.

Otra temas propulsante de la campania ia es la froda permeante, como ance la povria e nonegalia esperiada par multe filipinos an con la crese economial su la presidente partinte Benigno “Noynoy” Aquino.

Ofisiores de la eleje ia nota un partisipa recordo a voterias, do plu ca 81% de la 54 milion votores rejistrada ia fa sua vota. On eleje ance senatores e sirca 18 mil ofisiores, incluinte maiores.

La sonda par la Consilio Pastoral Parocial per Vota Fidable ia indica ce, pos conta 90% de la votas presidental, Duterte ia reseta plu ca 14,8 milion votas. La acel organiza es asiniada par la comision elejal per monitori la contas, ma sua reportas no representa un resulta ofisial.

Roxas, un ministro pasada de internas e la oposor la plu prosima de Duterte, ia gania 8,6 milion votas.

Cuando la estende de sua vinse ia deveni clar, Duterte ia dise: “Lo es con umilia, umilia estrema, ce me aseta esta, la aproba de la popla.”

Roxas ia aseta la vinse de sua oposor. “On ave multe larmas en la sala. Me ta dise a vos ce esta no es un tempo per larmas. Per nosa pais, nos ia fa un move pasosa e susedosa de potia.”

Un otra oposor major, senator Grace Poe, ia es la prima ci ia sede sua defeta, prometente “colabora con la prosede de sani” pos un campania turbosa.

En la eleje per deveni vispresidente, Leni Robredo, un ativiste sosial, susede pico plu bon ca Ferdinand “Bongbong” Marcos, la fio de la tirano pasada Ferdinand Marcos.

Aquino retira se car la constitui restrinje presidentes a sola un periodo de ses anios. En cuando Duterte ia leva en sondas opinal ante la vota, Aquino ia atenta uni otra aspirores contra el, avertinte ce sua eleje ta pote causa un revade a tirania per la Pilipinas.

Duterte ia fa multe declaras controversa en sua campania, disente ce el va masacra criminores e usores de drogas, bromante sur la viole sesal de un misionor australian, e comentante ce el ta clui la Congresa si el no ta acorda con el.

El ia presenta ance opinas franca sur la disputa teritorial de la Pilipinas con Xina en la Mar Xines Sude, disente ce el va naviga a isolas disputada e planta ala la bandera pilipina.

La Pilipinas ia prende un de sua reclamas a un corte arbitral en Den Haag en Nederland. Ier, Duterte ia dise ce el va xerca discutes multiladal sur la tema, incluinte la SUA e Japan.