AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
7 janero 2016
La comersia en mercatos xines continental ia pausa per la dia, pos cuando asiones ia cade par plu ca 7% a la ves du de esta semana.
La regula “rompesircuito”, introduida per redui volatilia, ia es ativida en la tredes minutos prima de comersia.
Investores ia deveni ansiosa cuando la banco sentral ia ata per debili la iuan. Esta ia indica ce Beijing desira aumenta sua esportas, car cisa la economia de la pais lenti plu ca prevideda.
La indise CSI 300, cual ia causa la para de comersia, ia cade par 7,2% a 3284,74. La indise es un colie de asiones major de Xanghai e Xenjen, e lo ia comensa par ativi un pausa de 15 minutos cuando lo ia cade par 5%.
La indise Xanghai Composada, un mesurador de comersia en Xina, ia cade ance, par 7,3% a 3115,89, e la Xenjen Composada, cual conteni multe asiones tecnolojial, ia perde 8,3% ante la sesa completa de comersia per oji.
Esta ia es la dia la plu corta de comersia en la istoria de 25 anios de la asioneria de Xina.
Pos la para, la Comision Regulante de Titulos Finansial de Xina ia anunsia ce asionores major no pote vende plu ca 1% de la asiones de un compania en la tre menses comensante a 9 janero.
Un regula de ses menses cual ia proibi ce asionores major vende sua asiones va fini a venerdi.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).