La avion noncarburante cual ia sirconaviga la mundo

Impulsa Solal, la avion de zero carburante, ia parti de la capital misre, Qahira, en la paso final de sua turi de globo.

Lo viaja a Abu Zabi en la Amirias Arabi Unida, do lo ia comensa sua sirconaviga en marto 2015.

La viaja va ocupa sirca 48 oras, e la pilote es Bertrand Piccard.

On previde un vola relativa simple, an si la ecipo ave ansia sur la efeto de la caldia en Asia sude-ueste a la avion. Piccard va debe probable spende multe tempo a altia grande, enspirante osijen aumental, per leva supra la colones termal e la turba cual los produi.

La aira plu calda e min densa supra la deserto saudi va labora ance plu la motores per propulsa la veculo. Par causa de esta, on va maneja atendente la reservas de enerjia en la pilas de polimer de litio, per serti ce los susta la avion tra la oras de note.

Impulsa Solal ia viaja tra 30 mil cilometres en sua aventura per deveni la avion prima cual sirconaviga la mundo par sola la enerjia de la sol, en loca de carburante.

La vola de Qahira a Abu Zabi es la parte 17 e final en sua viaja grande, cual ia inclui traversas de la Mares Pasifica e Atlantica.

Piccard e André Borschberg, sua ami e asosior comersial, ia alterna como pilote.

La duple ia espera completi la defia en la anio pasada, ma sua progresa no ia es sufisinte rapida per encontra la clima la plu bon en la estate de la emisfera norde. E cuando la pilas ia es danada en un viaja epica de sinco dias e notes supra la Pasifica ueste en junio e julio 2015, on ia deside resta a tera per des menses.

La idea ia nase cuando Piccard ia fa la sirconaviga prima nonparante en balon en 1999. Sua balon ia ariva apena, aterante en la deserto misre con cuasi no reservas restante de la propano cual lo ia usa per susta sua vola.

Piccard ia dise alora ce un otra metodo debe esiste.

El aseta ce aviones comersial no es a punto de cambia sua motores de jeto a selulas solal, ma el razona ce enerjia solal va ave un rol en la futur de avioni.

“Me aposta,” el ia dise, “ce pos des anios nos va ave aviones eletrical con 50 pasajores per volas corta o media. On pote vola sin contamina e sin ruido, ma aterante en airoportos urban, creante no disturba per la visinas.”