Un mision a Mercurio fini con colpa

La mision Messenger (“Mesajor”) par NASA a Mercurio ia fini esplodente, pos des anios en spasio e cuatro en orbita.

La veculo ia cade sur un area prosima a la polo norde de la planeta, nonvidable de la Tera, a sirca 20:00 de ora universal ier.

Siensistes ia confirma esta a alga minutos plu tarda, cuando los ia reseta mera un silentia en loca de la comunica seguente de la veculo.

Messenger ia ateni Mercurio en 2011 e ia suprapasa multe sua intende fundal de orbita per un anio.

Ier, lo ia colpa la surfas de la planeta la plu peti de nosa sistem solal a 14 mil cilometres per ora – la desduple de la rapidia de sona.

La xoca ia destrui completa la veculo, e lo ia aveni car Mercurio no ave un atmosfera densa cual ta arde ojetos entrante.

La veculo de tre metres ia pesa 513 cilogrames. Calculas indica ce lo ia formi un crater nova con grandia de un campo de tenis. Ma acel es multe tro peti per es vidable de asi.

Sua furni de carburante, cual ia representa un dui de sua pesa cuando lo ia es lansada en 2004, ia deveni intera spendeda a alga semanas ante aora.

Ma on ia susede fa cuatro manobras final per estende plu la vola, par relasa la elio normal usada per move carburante a la puxadores. La ultima de esta manobras ia aveni a 28 april.

En sua mision, Messenger ia cambia multe nosa comprende de la planeta Mercurio. Lo ia envia plu ca 270 mil imajes e 10 terabaites de mesuras siensal.

Lo ia deteta indicas de acua ascondente en la ombras de la crateres polal, e ia descovre ce la campo magnetal de Mercurio es bizara nonsentrida, deslocada longo la ase de la planeta par 10% de sua diametre.

Tra cuatro anios e 4104 sirculos, Messenger ia segue un orbita estrema elise sirca Mercurio. Lo ia vaga frecuente a un distantia de cuasi la duple de la diametre de la planeta, ante reveni a min ca 96 cilometres a la plu prosima.

Per manteni esta ritmo an entre interfere par la Sol, la veculo ia nesesa usa sua motor a un ves en cada pico de menses. La resulta nonevitable ia es ce la mision ia fronti un fini violente cuando la carburante ia deveni consumada.

Lo ia fa sua pasa cuasi ultima a distantia de entre 300 e 600 metres – no multe plu ca la altia de la Tore Eiffel – a sirca 13:00 ier.

Car la colpa ia aveni a la lado de la planeta nonvidable de la Tera, la veculo no es ia comunicante en sua momentos final. Donce probable lo ia porta plu ca mil imajes nonvideda a sua loca de reposa.

La nom Messenger ia es un corti de “Mercury Surface, Space Environment, Geochemistry, Ranging” (surfas, ambiente spasial, jeocimica, jeometre).