Un busor deutx bonveni migrores a sua pais

Un busor deutx ia atrae la atende de jornalistes pos pausa per fa un parla bonveninte a un grupo de migrores en sua bus.

Sven Latteyer ia improvisa la anunsia en cuando el ia gida sua bus sirca Erlangen, un vila calma en Baiern, con pasajores ci ia inclui sirca 15 stranjeres joven, de ci alga ia es de Africa.

Un otra pasajor raconta ce la busor ia saisi sua microfon e ia dise en engles: “Pardona me, senioras e seniores de tra la mundo intera en esta bus – me vole dise alga cosa. Me vole dise bonveni. Bonveni a Deutxland, bonveni a mea pais.” El ia conclui con: “Ave un bon dia!”

La parla ia es oiada con fases stonada, segueda par ries e aplaudis, incluinte de la deutxes. “Un de la xicos african ia brosi un larma de sua oio.”

La raconta ia sperde virusin en Deutxland, provocante un onda de respondes positiva. “Lodas a la busor,” un om ia tuita con un emosicon de cor roja. Un otra person ia scrive: “Resente me ia comenta ce nun dise bonveni a Deutxland. Lo es bon ce me ia era.” An un lejor de novas en un canal nasional de televisa ia pare emosiosa en reporta la aveni.

Latteyer dise ce el ia senti inspirada a fa la parla par la esperia de sua frate par sposi, ci ia fuji de la gera de Cosovo en la desenio de 1990, e sua avo, ci ia es ferida en la Gera Mundal Du.

Cuasi 180 000 persones ia xerca refuja en Deutxland en la dui prima de 2015 – la duple de la cuantia ci ia fa tal en la mesma periodo de la anio pasada. On ia vide ance un aumenta de atacas contra abitadas de migrores, incluinte vandalisme e ensendes criminal fada par grupos estrema destriste tra la pais.