AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Premios a la festa sinematografial de Venezia

13 setembre 2015

Un filma venezuelan, locada entre la caos e violentia de la capital Caracas, ia gania la Leon de Oro, la premio xef a la festa sinematografial de Venezia.

En Desde allá (De Ala), la dirijor Lorenzo Vigas nara sur un om rica ci deveni sesal envolveda con un om joven de un de la ganges de la site.

Venezuela esperia un crise economial sever, cual ia provoca menses de protestas sur strada en la anio pasada a la manca de multe benes. A jovedi, Leopoldo López, un gidor major oposante, ia es condenada a 13 anios e 9 menses en prison per tisa violentia en acel protestas.

Vigas ia dise ce filmas debe aida la paises latina a “aprende de la eras de la pasada”.

Entretempo, La clan, un triler arjentina de crimin dirijeda par Pablo Trapero, ia gania la Leon de Arjento per la dirijor la plu bon.

La filma, cual ia es estrema susedosa en Arjentina, presenta la raconta vera de un familia comun de Buenos Aires ci ia saisi persones rica per rescate e ia asconde los en sua casa ante mata los.

La dirijor mexican Alfonso Cuarón ia es la presidente de la juria de la festa sinematografial de Venezia en esta anio. El ia dise ce el ia es plaseda ce un filma latina ia gania la premio xef, ma ia dise ce lo es “mera un coaveni” ce la juria ia es gidada par un mexican.

La premio sucampion de Juria Grande ia es donada a Anomalisa, un fantasia comedial SUA cual ia es dirijeda par Duke Johnson e Charlie Kaufman.

Fabrice Luchini, ci ia jua la rol de un judor en la filma La ermino par Christian Vincent, ia reseta la premio per la ator la plu bon.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).