On leje un libro antica rolada par raios X

A la ves prima, on ia leje parolas de un libro rolada cual ia deveni ardeda e enterada par Monte Vesuvio en la anio 79 ec.

La roladas de Herculaneo, la sola biblioteca clasica ancora esisente, ia es colpada par gas volcanal con temperatur de plu ca 300°C, e los es estrema frajil.

A la interna profonda de un de la roladas, fisicistes ia susede distingui la inca e la paper, par un tecnica radiografial usada en scanes de seno.

On crede ce otra roladas pote es simil desifrida sin desrola los.

La vila Herculaneo, nomida “la otra Pompei” a veses, ia es enterada su sene par la volcan. En la sentenio 18, on ia escava un biblioteca notable de roladas en un de sua casas.

Atentas presedente de leje los, tra multe desenios, ia envolve stratejias spesial per desmarania tan delicata como posible la roladas.

An si on ia susede leje alga fratos desrolada, xef en anios resente con aida de cameras infraroja, on ia abandona final tal atentas de desrola car los destrui tro multe la roladas.

Otra atentas de regarda la internas, par usa de tomografia de computador, ia revela la forma de la stratos antica e enrolada, ma ia desifri nunca sua contenidas.

Aora en Italia, un ecipo gidada par dotor Vito Mocella de un instituida de eletronica en Napoli ia identifia un cuantia peti de leteras elinica a interna de un de la roladas a la ves prima.

La radiografia tradisional mesura simple la cuantia de raios X cual permea partes diversa de un ojeto. Ma la metodo nova usa la fato ce raios X pasante tra un ojeto deveni retardada – la fase de sua ondas cambia.

An varias pico en la composa de la ojeto afeta acel cambia, donce par mesura esta “contrasta de fase” on pote produi un imaje multe detaliosa, en tre dimensiones, de la strutur interna.