On investiga ancora la cade de la avion rusce

La xef egiptian de la ecipo internasional ci investiga la cade de un avion rusce en Sina ia dise ce lo es tro temprana per identifia la causa. Ayman al-Muqaddam ia dise ce on considera ancora tota posibles.

A venerdi, ofisiores franses ia sujesta ce la asidente ia es causada par un esplode violente.

La Airbus 321 ia cade a la Penisola de Sina a 31 otobre, matante tota de la 224 persones portada, corta pos enaira de la vacanseria Sharm el-Sheikh.

Plu temprana a saturdi, la ministro egiptian de esternas, Sameh Shoukry, ia critica ce alga paises nonidentifiada ia fali comparti informas pertinente con Egipte. El ia comenta ce Egipte “ia previde ce la informas furnida a nivel tecnical va es furnida a nos, en loca de deveni publicida a jornalistes en esta manera abrida.”

La SUA e la Rena Unida ia dise ce informas indica forte la posible ce la causa ia es un bomba. La Rena Unida ia para volas a Sharm el-Sheikh e retrae sua sitadanes.

Shoukry ia critica ance un fali de colabora en combate terorisme, acusante alga paises de “consentra a sua propre interesas” e suestimante la defias cual fronti Egipte. Ma John Casson, la ambasador de la Rena Unida a Egipte, ia responde ce el mesma ia es en contata prosima con la governa egiptian, revelante tota informas e esplicante la razonas per la desides.

Muqaddam ia confirma reportas ce on ia oia un ruido en la secondo final de la sona caturada par la rejistrador de voses de pilote, ma ia dise ce on debe ancora fa un analise spetral de la sona.

La plu de la vitimes de la asidente ia es rusce. Rusia ia dise a venerdi ce lo suspende volas a la intera de Egipte e recomenda ce sua vacansores – en cuantia de 80 mil – reveni a Rusia. Arkady Dvorkovich, la ministro xef suordinada, ia dise ier ce des aviones portante rusces reveninte ia parti ja de Egipte.

Ativistes conoseda como Provinse Sina, e liada a la grupo Stato Islamiste, ia dise ce los ia cade la avion, ma no ia revela como. Stato Islamiste ia recomenda un gera contra ambos Rusia e la SUA par causa de sua atacas airal en Suria.

Un compania difusante en la SUA ia dise a venerdi ce on ia intersepi comunicas entre ofisiores de Stato Islamiste en Suria en persones en Sina sur la cade de la avion. Lo ia sita un ofisior SUA, sin nomi el, ci ia dise: “Los ia selebra clar.”

La envolve de Stato Islamiste en la cade ta cambia multe la nivel de menasa presentada par lo e sua partenores.