AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
11 febrero 2015
Australia ia perde ja un desi de sua spesies de mamales nativa en la 200 anios pasada. No otra nasion ia esperia un rapidia tan alta de perde de mamales de tera en acel periodo.
La perde es xef causada par la ativias predorin de la gato savaje e la volpe roja, cual on ia introdui de Europa. Focones grande per maneja la tera fa ance un efeto.
Como un nasion rica con popla peti, on ta previde ce la animales de Australia es relativa secur de tal menasas como la perde de abitadas.
Ma un esplora nova de la mamales nativa, publicida en la jornal Prosegues de la Academia Nasional de Siensas, sujesta ce la problem es plu grave ca on ia suposa.
De 1788, 11% de 273 spesies de mamales nativa sur tera ia deveni estinguida; 21% es perilida; e 15% es prosima a peril. La situa es alga plu bon per mamales de mar.
On estima ce la continente conteni sirca 15 e 23 milion gatos savaje.
Medios pratical per proteje la spesies nativa inclui boni la biosecuria sur isolas costal, do on trova min gatos e volpes savaje.
La isolas ta pote ance opera como arcas per spesies perilida. On considera an la usa cauta de foco e otra medios per elimina esta predores.
Ma la rexercores averti ce cisa australianes va nesesa final revisa sua modo de vive per impedi la perde de natur.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).