Indonesia esecuta sete stranjeres sur drogas

Ban Ki-moon, ia secretor jeneral de la Nasiones Unida, ia espresa “un regrete profonda” sur la esecuta par Indonesia de oto persones condenada sur crimines de droga.

La sete stranjeres e un indonesian ia es esecutada par fusili ier, provocante un furia diplomata.

En un declara, Ban ia dise ce la puni de mori ave “no loca en la sentenio 21”, e ia recomenda forte ce Indonesia salva tota otra prisonidas tal condenada.

Indonesia ia defende firma sua atas como un parte de sua “gera contra drogas”.

Entre la prisonidas matada ia es du australianes – Andrew Chan e Myuran Sukumaran – e Rodrigo Gularte, un brasilera. Tota ia es condenada per contrabanda drogas.

Australia, un aliada major de Indonesia, ia protesta par retira sua ambasador.

Tony Abbott, la ministro xef de Australia, ia descrive la trata de la prisonidas australian como “cruel e nonesesada”, e un “momento ombrosa” en la relatas entre Australia e Indonesia.

Brasil ia dise ce la esecuta de Gularte – ci on ia diagnose con un maladia sever de mente – ia es “un aveni seria en la relatas entre la du paises”.

El ia es la brasilera du ci Indonesia ia esecuta per contrabanda drogas en la cuatro menses pasada. Un prete ci ia acompania Gularte en cuando el ia vade a la fusili ia informa jornalistes ce el no ia pare comprende ce el es a punto de mori.

Nijeria ia espresa ance “un delude profonda” sur la esecuta de cuatro de sua sitadanes. Orijinal, on ia reporta noncoreta ce un de los ia veni de Gana.

An tal, en Pilipinas, on ia selebra pos la salva de un fem pilipina de esecuta a la minuto final.

La mata de Mary Jane Veloso ia es posponeda cuando la governa indonesian ia acorda permete ce el atesta en la caso de la fem ci el ia acusa de planta eroina en sua bagaje.

Maria Kristina Sergio ia presenta se a la polisia, nonespetada, en esta semana, e on ia prende el a Manila, la capital pilipina, per investigas.

Un franses, Serge Areski Atlaoui, resta en la coredor de mori. El ave un cexa legal ancora no prosededa sur sua demanda per pardona.

La leges sur drogas en Indonesia es entre la plu severes de mundo. En 2013, la pais ia fini sua suspende de esecutas per cuatro anios.

La governa dise ce lo condui tan sever par causa de la propre problemes de drogas en la pais, declarante ce 33 indonesianes mori a cada dia como resulta de esta problemes.