AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
8 febrero 2015
Rebelores de la militia FARC de Colombia ia invita la Seniora Universo nova coronida a aida sua negosias per pas con la governa.
En un declara publicida a sua loca de rede, la grupo ia dise ce los aseta un ofre fada par Paulina Vega, de Colombia, en sua xerca per gania sua titulo.
Vega, ci ave 22 anios, ancora no ia responde a esta.
La armada rebelante es ja en discute con la governa tra la du anios pasada. Lo fa ja un gera de gerilia contra la governa tra 50 anios.
Representores de ambos lados atenta ateni un acorda, ma la discutes en Habana, la capital de Cuba, ia ariva a un state de nonprogresa.
On ia acorda sur temas de reformi de tera e de la entra de la FARC a politica formal. Ma un trata final de pas resta nontrovable.
En intervisas ante sua coroni como Seniora Universo, Vega ia parla sur sua desira de vide pas en Colombia.
En sua declara, la rebelores de FARC ia dise ce los bonveni sua “volentia” de viaja a Habana, ajuntante: “Nos invita tu a reali tua visita afin nos informa tu sur la developa de la discutes de pas.”
On estima ce sirca 220 mil persones, de ci la plu ia es nonmilitar, ia es matada de pos la rebelores, con inspira marxiste, ia comensa sua batalia armada en 1964.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).