Comentas scandalosa par Donald Trump

En la SUA, la Pentagon ia averti ce la retorica antimuslim de Donald Trump sumina la securia par aida la grupo Daex.

La aspiror major republiciste per la presidentia ia dise ce on debe proibi muslimes de entra a la SUA, seguente un ataca matante en California.

Tra la mundo, persones ia es xocada e ofendeda par la comentas de Trump.

John Kerry, la ministro de esternas de la SUA, ia junta se a la condena a la posmedia de ier, disente ce la comentas “no es construinte” en la batalia contra Daex.

La combatosas de Daex es la blanco de la campania de bombi, gidada par la SUA, en Suria e Irac.

Trump ia anunsia sua proposa a mera un pico de dias pos cuando un ataca en California ia crea temes en la SUA sur terorisme interna. Un duple muslim, sur ci on crede ce los ia deveni estremida, ia fusili e mata 14 persones a un sentro de sania en la site San Bernardino.

On reporta ce un de la du atacores, Tashfeen Malik, ia promete sua fida a Daex a la dia de la trajedia.

Ma en responde a la comentas de Trump, la Pentagon ia dise ce un frontera cluida per muslimes ta impedi la laboras SUA per oposa ideolojias estrema.

Sin usa la nom de Trump, un portavose de la Pentagon ia dise: “Cualce cosa cual forti la situa de Daex e pone la Statos Unida contra la fida muslim es serta no sola contra nosa valuas ma contra nosa securia nasional.”

Esta ia es un eco de un tuita de Hillary Clinton cual ia dise ce la proposa par Trump es “no sola contra nosa valuas – lo entra direta a la jua de la teroristes.”

La coleria ia segue rapida pos cuando Trump ia dise en un declara a la sera de lundi ce muslimes ave un “odia” a America e debe es proibida “asta cuando la representores de nosa pais pote comprende lo cual aveni”.

La bilionor de imobila e stela de TV de realia ia dise plu tarda ce la regula no ta aplica a persones ci abita ja en la SUA. Ier, el ia defende plu la idea, egalinte lo a politicas realida par Franklin Roosevelt en la Gera Du Mundal contra persones japanes, deutx, e italian en la SUA.

Ma xefes muslim, la Nasiones Unida, e xefes de otra paises ia critica la proposa como perilosa e dividente. La Casa Blanca ia dise ce on debe elimina Trump de la concurso presidental.

Atentante esplica sua comentas, Trump ia dise ce partes de London es “tan estremida ce la polisia teme perde sua vives”.

La maior de London, Boris Johnson, ia dise ce esta es “riable”, e ia ajunta: “La sola razona perce me no ta vade a alga partes de New York es la risca real de encontra Donald Trump.”

Xefes de la partito republiciste ia reata forte per condena Trump. Paul Ryan, la presidente de la Salon basa, ia dise: “Lo cual ia es ier proposada no es lo cual esta partito representa. E plu importante, lo no es lo cual esta pais representa.”