AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
5 april 2014
Un xico de sinco anios ia descovre un problem de securia en la servi Xbox Live de Microsoft. La compania ia grasia formal el.
Kristoffer Von Hassel, de San Diego en California, ia trova un metodo de entra a la conta de sua padre sin la parola secreta. Microsoft ia coreti la defeto e ia ajunta Kristoffer a sua lista reconoseda de rexercores sur securia.
Pos cuando la xico ia tape un parola noncoreta a la scermo prima de identifia, la sistem ia mostra un scermo du simil. El ia trova ce si el fa no plu ca tape multe spasios per la parola secreta a la scermo du, la sistem ia permete ce el entra a la conta.
En un intervisa en sua televisa local, Kristoffer ia dise: “Me ia deveni nervosa. Me ia pensa ce mea padre va trova lo cual me ia fa. Me ia pensa ce algun va fura la Xbox.”
Sua padre Robert, ci labora en la campo de securia, ia envia la detalias a Microsoft.
La compania ia dise: “Nos escuta sempre nosa clientes, e nos grasia los cuando los mostra problemes a nos.” Lo ia dona a Kristoffer ance cuatro juas, 50 dolares, e un enscrive a Xbox Live per un anio.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).