Un satelite barati ariva en orbita de Marte

Barat ia susede pone un satelite en orbita sirca Marte, deveninte la pais cuatro cual ia fa esta.

Mangalyaan, un sonda robotal cual es entre la misiones interplanetal la min custosa, va comensa pronto studia la atmosfera de la planeta roja.

Narendra Modi, la ministro xef de Barat, ia dise ce la pais ia ateni “la cuasi nonposible”.

Parlante a la sentro de mision en la site Bangalore, el ia comenta: “La probablia no ia favore nos. De 51 misiones atentada en la mundo, sola 21 ia susede. Nos ia vinse.”

Sola la SUA, Europa e Rusia ia envia misiones a Marte a ante. Barat es la pais prima cual ia susede a sua atenta prima.

La satelite SUA la plu resente, Maven, ia ariva a Marte a lundi. NASA, la departe SUA de spasio, ia loda sua corespondente barati, la Organiza Barati de Spasio e Rexerca, sur la susede.

De temprana en la matina, siensistes ia senta ante sua monitores, trasante la progresa de Mangalyaan. Multe de los ia es femes, e alga ia es joven.

Scermos jigante supra sua testas ia furni un flue constante de datos. La aclamas prima ia es oiada cuando la satelite ia inisia susedosa sua motor de propulsante licuida, la prima en un serie de moves importante per serti ce lo va es caturada par la gravita de la planeta.

Pos acel, on ia debe espeta tra 20 minutos longa, en cuando Mangalyaan ia desapare a retro de Marte, ultra contata. Final, cuando los ia vide confirma ce la satelite orbita aora la planeta, tota la siensistes ia sta subita per aclama, abrasa e aplaudi.

“Si nosa ecipo de criceta gania un torneo, la nasion selebra,” Modi ia dise. “La ateni de nosa siensistes es plu grande.”

La sonda va fa fotos de la planeta e studia sua atmosfera. Un gol major es atenta deteta metano en la aira martan. Si on trova lo, lo pote indica ativia biolojial a la surfas – o, plu probable, prosima su lo.