La UE lansa un satelite per monitori la state de la Tera

On ia lansa un roceto de Guian Franses con la satelite prima en un program nova de la Uni European per monitori la Tera. La veculo Sentinel-1a orbita aora en un mision per mapa la surfas de nosa planeta con radar. Un flotila de otra satelites, ance nomida Sentineles, va segue lo en la sinco anios seguente.

Bruxelles descrive sua program “Copernicus” como la atenta la plu grande de istoria per oserva nosa mundo. Cuando la sistem intera opera, lo va produi oto terabaites de datos en cada dia, detaliante la state de la surfas, la mares, e la atmosfera de la Tera.

Nasiones european ia dona 7,5 mil milion euros ($10,3 mil milion) a la projeta. Ma on intende ce la program va sesa nunca. Cada satelite Sentinel va es recambiada a la fini de sua mision, sertinte ce on ave informas continuante tra esta sentenio.

José Manuel Barroso, la Presidente de la Comision European, ia dise: “Esta investi va permete ce Europa institui se a la fronte de rexerca e inova en un campo estrema moderna – la spasio. On ia crea multe postos per persones capas, e multe plu va veni futur.”

La roceto Soyuz cual ia porta la oservador prima ia asende de la lanseria a la costa guianes a 18:02 de ora local (21:02 UTC). Sua viaja a la altia de 699 cilometres ia ocupa 23 minuts. Pronto a pos, on ia reseta un sinial confirmante ce Sentinel-1a ia separa bon de la roceto.

A la sentro de opera de la Departe Spasial European en Darmstadt en Deutxland, controlores ia comensa par inisia la satelite. Los ia spende la oras prima en envia comandas a lo afin lo despaci sua alas solal e la paneles de sua strumento de radar. Estas ia es pliada per pote senta en la roceto.

On previde ce la satelite va comensa formal sua servi pos sirca tre menses. An tal, probable lo va comensa imaji la Tera an en la semana veninte, per comensa la prosede de ajusta sua strumentos.

Radar ave multe usas, incluinte la monitori de vias de barcon per contamina o isberges, e la mapa de surfases teral per segue la desforesti o la produi de ris. Ma Sentinel-1a va es estrema usosa ance en responde a desastres. Radar es spesial bon per deteta la estende de acuas de inonda, e on emplea comun lo ance pos tremateras major per evalua danas a infrastrutur.