AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Ghani es inaugurada como presidente afgani

29 setembre 2014

On ia inaugura Ashraf Ghani como presidente de Afganistan en un rituo a la palasio presidental en Kabul.

Esta segue ses menses de nonprogresa en un disputa sur froda elejal e un reconta de votas.

Su un acorda negosiada par la SUA, Ghani emprende la posto de presidente, en cuando la suvinsor Abdullah Abdullah pote proposa algun per posto de ministro xef.

La taliban ia descrive la acorda como “un finje dirijeda par la SUA”, ma Ghani ia bonveni lo como “un vinse grande”.

A sua rituo inaugural, a cual asta 100 ofisiores alta ia es presente, Ghani ia jura obedi la constitui e otra leges.

El ia loda “la move prima democrata de potia” de la pais, e ia parla amin sur Abdullah, sua oposor e aora asosior en governa.

Abdullah, ci emprende un rol nova creada, ia dise ce la du gidores va colabora “per un futur plu bon con fida e onestia”.

Parlante a comensa de la rituo, Hamid Karzai, la presidente partinte, ia recomenda ce la popla suporta la governa nova. Karzai ia gida la pais de pos la despone de la governa taliban en 2001.

La ata prima cual on previde par la governa nova es la suscrive de un acorda par cual soldatos SUA va resta en Afganistan pos la fini de esta anio. Karzai ia oposa esta.

Securia en Kabul es forte oji. Poca persones es sur la stradas, e botecas es cluida. Un bomba ia esplode sur la strada a la airoporto, ma nun ia es ferida.

A venerdi, la taliban ia invade un distrito stratejial en Ghazni, un provinse este, asentuante la defias cual Ghani e sua fortes va fronti.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:33 UTC).