La Profador

La Profador, varia lfn de la Profator (de latina profari, “predise”, “dise como un profeta”), es un program cual intende crea poesias automata, o cisa esflue oraculos! El es scriveda en la lingua de program xlogo. Asì on ave la fonte abrida del Profador.
La Profador es resultada de un xerca tipal oulipin o ulepin (de ULePo, Utileria de Leteratura Potensial). (Me gusta multe la obra de Raymond Queneau Sento mil bilion poesias.) La poesia automata susede fasil crea ideas nunca pensada e imajes nunca videda ja; on pote usa lo como alga coan! 🙂
Xercan, con sua funsionas merveliosa, ia permete lista rapida la categorias gramatical cual la Profador nesesa per crea sua poesia! Grasias a el e a sua padre Simon! — Mixel 2020/08/07 17:38

• Grasias per la lia a la fonte. Cuando tu ia dise ce lo es scriveda en xlogo, me ia es surprendeda, ma pos regarda la fonte, me vide ce la strutur “pick” de acel lingua conveni multe per esta program. — Simon 2020/08/12 09:52
  • Xlogo fa fasil multe cosas sur la parolas e sur la listas de parolas… e lo es vera comprendable. La programeta pick permete la eleje acaso de un elemento entre diversa elementos de un lista. En efeto, lo es multe usosa per la Profador! — Mixel 2020/08/12 14:20
• Lo es lodable consisa. — Simon 2020/08/12 17:49

Como la Profador usa “el”, “lo”, “ci” e “cual”

Car la Profador no pote distingui el de lo, no ci de cual, el usa
• ci como forma sujeto pos cualce nom, e cual como forma ojeto pos cualce nom;
• el per cualce nom, e lo mera como sujeto “pupetin” nonpersonal (esemplo: “lo pluve”, “lo pare strana ce…”).

Inisia enlinia

Si on es fortunosa, cisa esta lia ta debe inisia la Profador enlinia… Per informa, la surfador Firefox permete inisia la fix JNLP cual abri la program, con la util Java WebStart 🙂 – a veses, lo pote es longa. Ma alga otra surfador no permete lo 🙁…

Varia nova del Profador

Me veni de carga la varia nova del Profador. Pico plu complicada, ma lo permete ce la linias no deveni tro longa, con tro multe parolas. Aora, la linias es constrinjeda a cuatro parolas xef, per dise a cuatro pulsas. A ante, un formula nomin ia pote inclui un nom + un formula ajetivin, ma la formula ajetivin ia pote es un suproposa ajetivin, en cual on pote trova un formula nomin, cual ia pote inclui un otra formula ajetivin, etc. E la linia ia pote longi, longi, longi… !
Aora, la acaso eleje inisial cuatro numeros de 0 a 4. Per esemplo la lista [0 2 3 2] jenera tre linias: la zero no comanda alga linia, la 2 comanda un linia de du parolas xef, la 3 comanda un linia de tre parolas xef, la 2 comanda un linia de du parolas xef. (Esta es un composa de haiku.) — Mixel 2020/08/24 16:55

Obras orijinal del Profador

Poesia automata – La Profador