Naretas
Alga naretas es bon, alga otras no es. Me no aspira eselentia. Me sola vole scrive.
Coretis es bonvenidas.
Mone Fasil
Pos un dia difisil de labora, me revade a mea casa. La via es oscur e me no vide multe persones paseante. Ante un casa, prosima a un baldon de dejeta, me vide un televisador cual pare multe bon. Me esamina lo, e me pensa ce posible sua problem ta pote es peti e fasil solvable. Me ta pote trae la televisador a mea casa, ma mea casa es peti e mea sposa es cexor, donce es plu bon lasa lo asi. Me continua paseante, asta ce me recorda ce alga persones sin casa ta pote gusta la televisador. “Mone fasil!” me ia pensa. Me revade a la baldon, me prende la televisador e me trae lo a la loca en cual multe persones sin casa vive.
“Esce vos vole esta televisador?” me cria a los.
“Serta!” un person sin casa dise en cuando el veni rapida asta me con brasos abrida.
Me ia turna rapida per no lasa ce el prende la televisador.
“Donce dona des monetas a me e la televisador va es tua,” me dise a el.
“O tu dona lo a nos, o nos va prende lo par forte,” un fem cria de un loca distante.
“Si! Si!” tota de los acorda riente.
“Esta no es nesesada, mea amis!” me dise temente.
“Me no ta debe fa esta,” me pensa.
Me lansa la televisador e me core rapida, ma mea bolsa es plen e pesosa. Tota de los core a pos me. Me no core frecuente, me no eserse me. Los ateni me e comensa bate me. Me cade e cria per aida. Nun veni aida me. Los fura de me e poi los core. “Mone fasil…” me ia pensa, “Mone fasil…”
La moneta
La xico jua sola en la rua. La venta colpa sua peto suosa e ximi sua pantala. El core, pasea, cria, xuxa, salta e acrupi. La pijones tema el car la xico es rapida como un lampo, e el ia susede ja prende un o du avias.
Alga cosa brilia sur la tera, ma no multe. La susia covre lo un pico. “Cua es acel?” la xico pensa. El segue la brilia e prende la cosa. “Un moneta!” el cria.
La xico core, e a pos el, la canes mal de la rua a lado ance core. El no teme los. El nunca ia teme. En efeto, la posesor de la canes teme la xico.
La xico ia ariva a un boteca peti e el ia compra lo cual el gusta la plu: un pan de la seniora Pupa. A pos, el ia senta sur un petra grande, el ia despaci la pan, el ia miga un pico per la pijones e ia separa alga pesos per la canes.
La xico ia revade a la loca en cual el ia jua e el ia lansa la pesos de pan al la pijones e a la canes, e a pos, el ia come sua pan en cuando el ia regarda la sua amis animal comente.