Un imno a la Tera Lagosa
Un gida ilustrada a la montania de la Tera Lagosa (A Pictorial Guide to the Lakeland Fells) es un serie de sete libros, scriveda par mano par A. Wainwright tra des-tre anios de 1952. Per cada pos lunlotra de 214 colinas en la Distrito de Lagos en England norde-ueste, la volumes presenta descrives e desinias detaliosa e poesin de la cualias natural, la vias per asende e desende, e la vistas de lagos e montes cual on pote saborea a la culminas. Asi es la introdui, traduida a elefen par Simon Davies en 2026.
Serta en tota esta mundo merveliosa on ave no otra loca intera simil a la Tera Lagosa … no otra tan esedente bela, no otra tan deletosa, no otra cual clama tan insistente a traversa del abiso de distantia. Totas ci ama vera la Tera Lagosa senti escluida en asentia.
Asi, en spasio peti, es la pais de mervelias del sonias de enfante, cual permane longa ultra enfantia tra la estende del vive personal: sua encanta crese con anios pasante e la sera calma es ricida par la dulsia persistente de recordas cara, recordas cual resta sempreverde tra la fuji de tempo, cual refresci e susta en la dias plu oscur. Tan multe, esta recordas …
la momento de velia, e la reconose subita joiosa ce esta va es un plu dia de libria sur la colinas …
la conserta a lus prima del canta de avias …
la dentela delicata de betules contra la sielo …
la sol de matina cual tira a lado la velos de nebleta …
ovetas de calsas negra, en primavera, entre la narsisos …
cascades arjento dansante e saltante sur presipes de filis …
colores de autono …
un volpe roja ci core sur neva …
la silentia de colinas solitar …
tona e tempesta en la locas alta, e la videtas nonespetada de vales colorosida par lus de sol, profonda su la nubes jirante …
la pluve, e la proteje intima de mures licenosa …
ventas ferose sur la altas e ventetas suave cual es no plu ca caresas dulse …
un can de pastor regardante sua mestre …
la neva e jelo e calmia jelante de mediainverno: un mundo blanca, de color rosin a reposa de sol …
la momento suprema cuando la tumuleta de culmina deveni final vidable, distante de mera minutos, pos la asende longa …
la peti oveas pelosa ci fronti la ventones nevosa …
la simfonias de rietas murmurante, nonsesante, nunca nonarmoniosa …
fuma risinte del ximines del cultiveria ala basa entre la arbores, do la dia va fini …
lampas de olio en cosinas de petras plata, focos jigante en ximinerias jigante, la comes jigante …
la lus de luna sintilinte sur acuas pasosa …
stelas supra apicos oscur …
la cuietia cual ariva ante dormi, cuando on pensa a la dia pasada e la dia veninte …
Tota esta recordas, e tan multe plu, enspirante denova la cualia rara e la atmosfera majiosa del Tera Lagosa …
recordas cual parteni a la Tera Lagosa, e no ta pote parteni en la mesma modo a cualce otra loca …
recordas cual sclavi la mente per sempre.
Multe es los ci ia cade su la encanta del Tera Lagosa, e multe es los ci ia es emosiada per raconta sua ama, en naras e versos e imajes e cantas.
Esta libro es la metodo de un om per espresa sua dedica a la colinas amin del Tera Lagosa. Lo ia es consepida, e lo nase, pos multe anios de adora silente a lor santerias.
Lo es, en veria mesma, un letera de ama.