Sitas de Jesus

Traduida par George Boeree

Vos ia oia ce on dise: “Tu debe ama tua visina e odia tua enemi.” Ma me dise a tu: “Ama tua enemis, bondise los ci maldise tu, fa bon a los ci odia tu, e prea per los ci usa despetante tu e persegue tu.” (Mateo 5: 43-44)

Nun pote servi du mestres. O tu va odia la un e ama la otra, o tu va es dedicada a la un e despeta la otra. Tu no pote servi e Dio e ricas. (Mateo 6: 24)

Vide la avias de la aira; los no semi, no falxi, no colie en granerias; an tal, tua Padre en la sielo nuri los. Esce tu no es multe plu importante ca los? (Mateo 6: 26)

No judi, afin tu no ta es judida. Car con la judi cual tu fa, tu va es judida; e con cualce puni cual tu dona, tu va reseta lo. (Mateo 7: 1-2)

Ma Jesus ia dise a los: “Los no debe parti; dona alga cosa per come a los.” (Mateo 14: 16)

Jesus ia dise a el: “Ta ce tu ama la Senior tua Dio con tota tua cor, con tota tua spirito, e con tota tua mente. Esta es la comanda prima e grande. E la comanda du es simil: Ta ce tu ama tua visina como tu mesma. Tota de la Lege e la Profetas pende de esta du comandas.” (Mateo 22: 37-40)

En cual modo algun benefica si el gania tota la mundo, ma perde sua spirito? (Mateo 23: 12)

Car me ia fami, e vos ia dona carne a me; me ia sidi, e vos ia dona bevida a me; me ia es un stranjer, vos ia bonveni me; nuda, e vos ia vesti me; me ia es malada, e vos ia visita me; me ia es en prison, e vos ia veni a me. Alora la virtuosas va responde par demanda: “Senior, cuando nos ia vide ce tu fami e ia nuri tu? o sidi e ia dona bevida? Cuando nos ia vide tu como un stranjer e ia bonveni tu? o nuda e ia vesti tu? O cuando nos ia vide ce tu es malada o en prison, e ia visita tu?” E la Re va responde: “Vera, me dise a vos, tan multe ce vos ia fa estas per un de mea frates o sores la plu basa, vos ia fa estas per me.” (Mateo 25: 34-40)

Car los ci loda se va es umilida, e los ci umili se va es lodada. (Marco 8: 34-36)

Vos sabe ce la renores de esta mundo domina sua popla, e ofisiores ostenta sua autoria supra sua inferiores. Ma entre vos, lo va es diferente. Cualcun ci desira es un xef entre vos debe es vosa servor, e cualcun ci desira es la prima entre vos debe es la sclavo de la otras. Car an la Fio de Adam ia veni no per es servida ma per servi otras, e per dona sua vive como rescata per la multe. (Marco 10: 42-45)

Ma ama vosa enemis, fa bon per los, e presta a los sin espeta cualce redona. Alora, vosa recompensa va es grande, e vos va es la enfantes de el ci es la plu alta, car el es compatiosa a los ci es nongrasiosa e mal. (Luca 6: 35)

Perce tu nota la particula en la oio de tua frate, ma no persepi la faxon en tua propre oio? (Luca 6: 41)

E el ia dise: “Miseria va segue vos ance, legores! Car vos carga persones con cargas tro pesosa, e vos mesma no toca la cargas con an un de vosa ditos.” (Luca 11: 46)

Esta es como nos sabe la natur de ama: Jesus la Cristo ia dona sua vive per nos. E nos ta debe dona nosa vive per nosa frates e sores. Si cualcun ave poseses material e vide un frate o sore nesesante e el no ave compatia con el, como la ama de Dio pote es en acel person? Cara enfantes, ta ce nos no ama con parolas o parla, ma con atas e veria. (1 Joan 3: 16-18)

E en la templo, on trova los ci vende boves e oveas e pijones, e la intercambiores de mone. E cuando el ia fabrica un flajelo de cordetas, el ia forsa tota de los a estra la templo, e la oveas e la boves, e ia versa la mone de la intercambiores e ia inversa sua tables. E el ia dise a los ci vende pijones: Porta esta cosa a via; no fa ce la casa de mea Padre es un casa de benes per vende. (Joan 2: 14-16)

El ci es sin peca entre vos, ta ce el lansa la petra prima a la fem. (Joan 8: 7)