Poso
CARATERES:
- XASOR
- CAN
- POSO, poi JEZEBEL
(Sena: Un foresta profonda. La XASOR entra a la stadio, segueda par sua CAN.)
XASOR: Lo pare ce nos es perdeda.
E me senti un pico de fame.
Nos nesesa trova la via a casa plu temprana ca plu tarda.
CAN: Wau-wau! Me es un can!
XASOR: Gida nos a casa, xica.
(Los vade a estra la stadio e reentra pronto denova.)
XASOR: Ancora en la foresta.
CAN: Wau-wau! :aspeta multe felis:
XASOR: Per favore, gida nos a casa. Me no vole vera resta asi per sempre.
CAN: Wau-wau! Me es un can!
XASOR: Si, me sabe ci tu es. No nesesa repete denova lo a cada ves ;-;
(Majial, un POSO apare en la sentro de la stadio.)
XASOR: Dios!
POSO: Alo, vagores!
Vide la poso majiosa!
Vosi vosa desiras e los va es sasiada!
XASOR: U eselente! Oce! Em… “No loca como casa!”, per favore!
(Pausa.)
XASOR: Alo?…
(Pausa.)
XASOR: Esce alga cosa va aveni? O esce lo es un tipo de scema frodante?
POSO: Uf, reposa, om. Cual scema? Tu ia dona no cosa, leteral.
XASOR: Pardona, me ia pensa simple ce me va ta es teleportada a casa en un spirales de sintiles o simil.
POSO: Serta, serta. Me prepara la encanta. Lo nesesa tempo, es pasiente.
XASOR: Pardona.
POSO: Cada cosa nesesa tempo. La mesma es en la vive real, jeneral.
XASOR: Si, si, pardona, poso majiosa.
POSO: Lo es Jezebel.
XASOR: Como?…
POSO/JEZEBEL: Mea nom es Jezebel. Me no es la poso. Me es un sorsoresa ci ia cade en la poso.
XASOR: O, txa! Tu vole mea aida? Me ave un corda con me–
JEZEBEL: No, no. Me es oce.
La cosa es– em–
Pos ce me ia cade, me ia desira un piza. E poi, un plu. E…
Frasinte bela lo, me ia asorbe tro calorias per sorti a estra–
XASOR: O.
JEZEBEL: Si.
Ma me es oce.
Me ave tota cual me nesesa en asi. Cual es la piza, como tu pote divina.
CAN: Wau-wau! Me es un can!
JEZEBEL: Alo, can! Me es Jezebel! ^-^
XASOR: Parlante sur piza… Esce me pote ave alga? Me fami.
(Pausa.)
JEZEBEL: No…
XASOR: Perce no?
JEZEBEL: Lo es majia. La majia ata en un moda misteriosa…
XASOR: Misteriosa, si?…
JEZEBEL: Oce! Bon! Me es nonjentil e avar! Ance, la encanta es cuasi preparada. Tu va es a casa multe pronto.
An tal… un aviseta peti: si tua can vosi un desira, me va debe sasia lo–
XASOR: O! Idea stonante! Xica, pronto, desira un piza! Un grande! Con… tota ajuntada!
CAN: Wau-wau! Me es un can!
XASOR: Fraa.
JEZEBEL: Mdr.
Tal o no, tua encanta es preparada. Tu va es teleportada aora.
XASOR: Grasias, Jezebel.
CAN: Wau-wau!
JEZEBEL: No problem. Bon teleporta!
(La XASOR e CAN desapare.)
JEZEBEL: Oce… Aora, a la demanda importante. Cua lo va es per come de sera?
(La regardores cria “PIZA!”)
JEZEBEL: Vera.
(Particulos peti de piza vola de en la POSO.)
JEZEBEL: Mm mm mm.
(Cortina.)