La sala de developa

CARATERES:

• GENDI
• TRAGON
• PRISONIDA

(Sena: La crosta profonda suteran con petra solida e minerales brilietante, rara. On ave du niveles nonliada ala.
A SU: Un selula peti de prison. Un sola leto. Un PRISONIDA reclina sur lo, regardante la sofito.
A SUPRA: Un sala peti, plenida con caxones larga. Un torxa unuple lumina sua ricia nonposible.)

(Un tunel orizonal es lenta escavada de la mur destra de la stadio. GENDI e TRAGON apare en lo. GENDI porta un torxa. TRAGON brandi un picon.
Los es completa nonconsensa de la sala plen de caxones, direta en lor via, e ance la selula de la PRISONIDA a su.)

(TRAGON fa un brandi final, parante esata pos ce on ave sola un pariete magra cual separa los de la sala con tesoro.)

TRAGON: Como plu tempo lo va prende?

GENDI: Sirca 15 minutos.

TRAGON: Me ia demanda acel a 15 minutos a ante e tu ia dise 15 minutos. Nos ia escava per 15 minutos e lo es an plu 15 minutos?

GENDI: Bon, cisa alga min ca 15 minutos.

TRAGON: Basta, Gendi. Tu bufoni me. Tu ave no idea do nos es.

GENDI: Escuta. On no ta nomi lo la sala de developa lejendin si lo ia ta es fasil a trova.

TRAGON: Esce tu es serta ce on ave an un sala de developa asi?

GENDI: Cada jua ave un sala de developa, Tragon! La tesoro enorme, lasada par la creores mesma, espeta nos! Nos va vinse la jua!

TRAGON: Lo es un caxa de arena enliniada, Gendi. On no ave “vinse la jua” en lo.

GENDI: U acel no es un disposa mental de un vinsor…

TRAGON: Car me es frustrada!

(A su, la PRISONIDA leva e comensa pasea pendulin.)

TRAGON: Me no ia vide la surfas per eternia!
Me no ia vide mea familia mesma per eternia!
Me escava como un loco e tota cual tu fa es teni la torxa e dise a me ce lo es un otra 15 minutos!

GENDI: Me ia dise a tu ce nos debe cambia! Tu no dona a me la picon.

TRAGON: Me ia paia un peson de recursos per esta picon.

GENDI: O, veni! La sala de developa ave utiles la plu bon en la servador!–

TRAGON: Basta. Me sorti.

GENDI: Noooooooooo! No sorti! E si la sala es sola un bloco distante de nos?

(Pausa.)

TRAGON: Esce tu ia vide la “Prisonida”?

GENDI: Em… La mediocre con Caviezel?

TRAGON: No. La mediocre con McGoohan. La orijinal.

GENDI: Me dise, me ia vide un duple de episodios. Esce lo es la motif de cambia acaso de la tema?

TRAGON: No, me construi un tese. Acel telenovela… no cosa en lo ia es razonable. Tota ia es un stilo sin un mesaje real.

GENDI: Em, me pensa ce lo ia ave un tipo de metamesaje sur como lo no ave un mesaje.

TRAGON: No. La xefes de serie no ia sabe mera cua los ia fa. Esata como nos.

(Pausa.
La PRISONIDA reclina denova.)

TRAGON: CI ES NUMERO UN?!

GENDI: TU ES NUMERO SES!

TRAGON: CUA TU VOLE?!

GENDI: LA INFORMA!

TRAGON: Bon, me ave no informa…

GENDI: Au :(

TRAGON: On ave no sala de developa asi, si?

GENDI: Veni…

TRAGON: Me jura a dio, si tu va dise “nos es sola un bloco distante de lo”, me va leo-trotsci tu con esta picon esata.

GENDI: -_-

TRAGON: Pardona, lo ia es multe sombre.

GENDI: E noncortes.

TRAGON: Si, ami, pardona. Me es fatigada. Me descomuta. Asta!

(TRAGON desapare.)

GENDI: Nooooo–

(Pausa.)

GENDI: Oce, bon. Me descomuta ance.

(GENDI desapare.
La PRISONIDA regarda la sofito de sua leto.)

(Cortina.)