La pex legal

CARATERES:

• PEX 1
• PEX 2
• JIRAFA

(Sena: La mar profonda, un resife briliante e colorosa de coral.)

(PEX 1 e PEX 2 nada a la stadio de lados oposada.)

PEX 1: Alooo!

PEX 2: Aloooo!

PEX 1: Como lo vade?

PEX 2: Lo nada.

(Ambos rie.)

PEX 2: Tan bon de es un pex!

PEX 1: Si! Me es un pexxx!

PEX 2: Me es ance un pexxxxx!

(JIRAFA flota lenta de supra.)

PEX 1: Alo.

PEX 2: Alo.

JIRAFA: Alo.

(Pausa.)

PEX 2: Tu es un pex?

JIRAFA: En un modo, si. Ma vera, me es un jirafa.

PEX 2: Cua? Como?

PEX 1: Esce tua spesie ia evolui per vive su acua?

JIRAFA: No. Me ia esplota un fesur en la lege maral. De aora, me es legal un pex.

PEX 2: Como tu maneja an es su acua?

JIRAFA: Jirafas es imitores perfeta de la natur. Nos es capas de fusa completa con la ambiente.

PEX 1: Me no ia oia acel a ante.

JIRAFA: Nun ia catura nos de sempre. Cual demostra la punto.

PEX 1: U.

PEX 2: Esce tu intende resta asi?

JIRAFA: Mhm. Me ia fa alga crimines de colar blanca e nesesa asconde me a basa. La mar es simple la plu basa de cual me ia pote pensa.

PEX 2: Bon pensa.

JIRAFA: Grasias. Me es Anton, en pasa. Cua es vosa nomes?

PEX 2: Nomes? Nos no ave nomes.

PEX 1: On ave tro multe pexes en la mar per dona a cada pex un nom.

JIRAFA: Esce vos no truci aora me?

PEX 1: No.

PEX 2: Ance, nos es, per la plu, asoluta la mesma e completa intercambiable.

(PEX 1 e PEX 2 intercambia rapida la locas a plur veses.)

JIRAFA: O, mea.

PEX 1: Si. A veses, me vole sabe esce me es me o un otra pex.

PEX 2: Si. A veses, me vole sabe esce me es me o alga person en sua sala, scrivente esta peso esata.

PEX 1: Si.

JIRAFA: Me no es serta si me es preparada a es un pex.

PEX 2: Tu ia ta debe pensa sur lo ante fa tua crimines de colar blanca.

JIRAFA: Un punto justa.

PEX 1: O! Esce me pote ave un nom?! Per sola un minuto, per favore?

PEX 2: Ance me!

JIRAFA: Em, serta. Cualce cosa si lo flota vosa barco.

PEX 1: “Barco”? Cua es “barco”?

PEX 2: Tu sabe cua es un barco, tu, fol.

PEX 1: O. Si.

PEX 2: Oce. Mea nom va es Utsucuxi!

PEX 1: E mea nom va es Mari Enrieta Teresa, Prinsesa de Frans!

PEX 2: Majestia! :plia cortal:

JIRAFA: Me va xerca un otra loca per asconde. La mar es tro… caososa.

PEX 2: Tu ta pote imita un avia.

PEX 1: Si. O un elicotor.

JIRAFA: Si…

(JIRAFA flota a supra de la stadio.
Pausa.)

PEX 1: Utsucuxi.

PEX 2: Si?

PEX 1: Esce tu ia vide “Jua de calamar”?

PEX 2: Si.

PEX 1: Ci ia vinse?

PEX 2: Alga umana.

(Cortina.)