Dinosauro
CARATERES:
- FIFI
- MIMI
- LILI
- SERVADOR
(Sena: Un cranio enorme blanca de un dinosauro reclina sur la stadio.
MIMI sta sur lo, vestida formal.
LILI sta a sua funda, vestida formal ance.)
(FIFI entra en vestes de bufon.)
FIFI: Me es tarda?
MIMI: No, Fifi. Cambia tua apare, pf. Lo es un rituo.
FIFI: O! Vera!
(FIFI jela. Sua vestes de bufon cambia instante a vestes simil a otras.)
MIMI: Grasias.
Nos va comensa aora.
Hm. Grasias, cadun, per veni asi oji. Nos ia asembla per recorda Lizy, mea dinosauro domada.
El ia es un creada pur de caos. El ia gusta vaga la campos, pedi petras, xasa sua coda e morde otra persones, nonprovocada.
Regretable, ier, alga vandal ia deside prende tro temprana sua vive.
LILI: (cuieta) Grasias a sielo *-*
MIMI: Ha ha! Xux…
*Tose*
Ma! Cisa lo ia es no un vandal. Cisa lo ia es mera algun ci no ia aprende la difere entre “USA” e “COLPA”.
FIFI: Uf. Me an no ia es enliniada ier.
SERVADOR: La autentici presedente de Fifi: ier, 19:42. Longia de sesion: 12 minutos.
LILI: Esposadaaaaa~
FIFI: Oce bon! Me ia entra per corta, afin vide ci es enliniada! Oce? Lo no fa me a un mator de dinosauros!
MIMI: No disputas. Esta es un momento seria.
Hm.
Lizy, nos va ama tu e nos va recorda tu.
Ta ce tua alma reapare en la servador de la sielo con campos vasta per vaga e petras nonfinita per pedi.
Pixeles a pixeles. Baites a baites. Amen.
(MIMI lansa flores sur la cranio.
LILI e FIFI fa la mesma.
Poi los comensa covre la cranio con blocos de tera.)
FIFI: Tu sabe, lo no es an un cranio de dinosauro. Dinosauros ia ave fenestrae—
MIMI: Xux!
(Los fini.)
MIMI: Grasias, cadun! Lo es fada. ^-^
LILI: No problem. Grasias!
(LILI teleporta a via.)
FIFI: Bon. Tu vole vade trova un casa de comensor per vandali?
MIMI: Fifi, me no pote.
FIFI: Perce no? On va reporta nos en junta!
MIMI: Mea scola comensa doman. Me no va ave tempo per jua. No doman. No pos doman.
FIFI: O.
(Pausa.)
MIMI: Si.
(Pausa.)
FIFI: Tu va manca a me.
MIMI: Tu va manca a me ance.
(La lus desapare lenta a la negria.)
(Cortina.)