Iod, o La axiom prima
Asi
La sera strana! La sola cosa cual me recorda es ce me sta ante un porte. La clave turna lenta en la buco, me entra. La lus sutrae debil la oscuria de la sala.
Me pone mea xapo a solo, con mea capa; lo pare alora ce tota acel parteni a mea abituas, sin ce me sabe perce. Lo es vera ce mea cranio dole estrema.
[A esta momento, on esperia un emete defetosa; un vose du, nondistinguinte, covre la prima.]
« Yhwh Dirij… du arcanas… a angulo d… su altar a… iod destra… vapor sant… este entre… la poterna1… »
[Reprende.]
Me respira pico. La scalera es sempre tan longa asta asi. An tal me no recorda alga scalera. Ma la cosa la plu strana es la pesa de la silentia. Un person prima venida ia ta jura ce el sta en un catedral. En pasa, la person prima venida, asi — la sola —, es me. Ance esta es poca comun: perce esta loca es abandonada par la resta del mundo?
Con un tal dole de testa, me ia reposa sur la sofa e, gradal, cisa, me ia adormi. Sin ce me persepi, ante la miror nonemosiosa, la esiste nonesplicada de un bulto enorme sur mea cranio.
Tal me ia debe sorti de la casa silente e tal la lus osilante ia estingui.
1 Un porte streta e secreta, en la muron de un forteria, permetente un sorti (o entra) discreta cuando la forteria es atacada.
A en
Plu e plu frecuente — lo es tan clar —, a presente, mea sonias la plu resente pare versada en beton. Tota comensa en un universo cluida. A esta ves, los ia restrinje me en un spesie de sala de labora vacua sin fenetra. Los ia dise ce me debe espeta asi.
Ultra esta mures, on ave la vila. E me, me ta resta asi, en cuando la jente2 parla en la strada? Me va vade en esta vila do la jente ajita se — ma parla nunca a me. Cisa, on reproxa alga cosa a me (ci, an tal, nose nun). En pasa, me no escuta los. Me oia los neblosa, en un ronrona artifis simil a la silentia de la locas imajinal.
Me ia sorti de acel sala, per penetra en un coredor longa, cual curvi continua; cisa per ariva al sentro del spiral — la sola punto de crusa con la realia.
Al fini del coredor, me ia trova me a la limina de la bola rijida do un corpo mor reposa. E tota es desordinada. Me no ia regarda el vera, me sabe sola ce sua fas es contra la solo. Me serta no va fini como el! Me fuji.
La ronrona artifis ia cambia se aora a un crepita artifis. Me prosimi a la scalera cual gida al atrio. On ave multe persones, a basa, ma totas es ocupada. La dia ia veni.
De acel instante, la silentia fisa se. Me desende la grados de la scalera. Lenta. Ance la batetas de cor calmi. Nun regarda; nun suspeta donce ce me esiste. Lo apare a los como si nun ta es desendente la grados con pasos pesosa.
No plu ca un dia.
Me ia evade?
2 La jente: un parola dialetal per dise “persones diversa, persones comun”. Vide: italian la gente, catalan la gent, espaniol la gente e portuges a gente.
A estra
No. Me es ancora en la vila infinita. La aira scopi la strada. Me senti ancora calda per un momento. Me vade a pasea a la encontra ajendida par me. Cisa on espeta me. E u asi me. Cuasi libre? Libre de vaga tra la noia de un site sin usosia.
Prima la strada. Poi la momento de parti per xerca la poterna va aveni. La poterna! Lo esiste, ma do los ia pone lo? Esce on va indica lo a me al encontra fisada?
Prima la strada. Nunca me ia pasa ala. Per esta causa, me senti en descomforta. Si los ia ta intende encontra me, lo ta es fada de longa!
No multe jente, ance. Me no persepi la persones ci ia parla en la strada, ante corta.
Aora, me tremeta: ci ia es acel mor en la sala bolin? Un averti?
[Un interompe brusca de la comunica. Lo reprende, pos alga instante de crepita.]
Sin alga intende, me ia senta a un table de un caferia, con mures covreda par depintas. Ante me, un plaza peti vibra, e la vibras pleni sua arcadas luminosa.
« Ci ia mori el? Como me ta sabe? A mea lado, me ia vole mera sorti. »
Per aora, escutante la vibras del aira, me pare re-oia un musica strana familiar. Me reconose lo, e acel es sibilada par un boca nonconoseda… cual clama me? Esce on ta ave un sinial formal? E on no ia avisa me! La poterna! Posible esta es la razona de la clama…
« Cua tu vole?
— Me? No cosa. »
Lo no es vera: me vole gania un dia. Ma la servor del caferia no nesesa sabe lo. Me abri la oios e me leva. A tempo! Me xerca la sibilor. Futil. La strada mesma, lo pare, no ia oia.
Perce me sta ala? Me ia crede es en un caferia.
« Escusa me, esce on no ave un caferia asi? E un plaza peti con arcadas?
— Asi?
— Si… a prosima, me crede. Me ia debe perde me…
— Vade reta; on ave un plaza. Multe prosima.
— On no ave un plaza de do me veni?
— Me no sabe. Me no sabe de do tu veni. E me no conose alga plaza con arcadas asi. Tu debe era.
— Sin duta… Escusa me. »
El menti. Como tota la otras. Ma me ta es embarasada si me ta vole dise de do me veni. Tota desorientada. E poi, do me ia oia parla de un plaza con arcadas?
Tota esta es a ves nova par causa de los!
Me ia pasea reta.
Evidente, lo ia es previdable: esta plaza sembla en no modo lo cual me xerca. Tota es tro moderna. E lo es regretable. Posible, asendente a alta de esta rascasielos, me ta vide la fini de la vila.
Me ia entra en un asendador, me ia alti.
Me ia vide no cosa: los ia oblida sola pone fenetras, la cosa la plu importante. Cisa par causa de la suisides, de la asidentes diplomata… Per evita la asfixia, on besa a alga veses bocas de venti libidosa. No nesesa de fenetras; no distrae de la labora, ance.
Me ia continua donce, siecin. Asta esta strada sin sorti do, alora, me ia recorda ce me ave un mapa en mea pox. Me persepi, aora, la froda: pajes blanca! Como me ta pote situa me en acel labirinto percoreda?
Ci pote sabe lo cual es ascondeda ultra un strada sin sorti? Un sola cosa per sabe: ta ce on vade a vide ala.
A ultra
Al fini, on ave un porte. Lo sufisi abri lo. Poi la porte clui se. Strana, lo es tan clar asi. En fato lo es ancora la efeto del abitua: mea aparte es tan oscur, e tota es tan calma! De cada lado de la coredor sentral, on encontra salas — sin duta, alga salas de clase.
La silentia desapare pico e pico, gradal, cuando me avansa, ante un misca confusa de voses cual esflue de un sala grande engolinte la coredor. La sala ultima. Un completi perfeta.
« Lo es tua turno de parla. »
Me, me senta. E, cisa, me ia comensa escuta. Cisa. Ma no per curiosia.
« Nos no ave cosa nesesada aprendable par los, nos no ave la direto de judi. Nos debe plu judi los ci prende esta direto de arbitra, an si nos esperia la enemia e la represa de la autoria instituida. »
El dise vera. Perce los es tan poca per aproba la dises vera? Posible, la otras teme la represa…
La represa! Los ia prende un person, denova, a esta matina, justa a fronte de me. Me ia regarda el: sola el ia es sinsera. La otras ia continua, nonsabente restrinjeda en regulas de jua arbitrar, e credente ce tal es la ordina del cosas.
A mea lado, lo pare a me ce asi es la sola loca de la vila do me prosimi a la libria. Ma esce me es ancora en la vila? Ancora un porte cual me debe pasa, per serti. Esta porte, lo es la porte ultima, ascondeda en un concava de la mures de la sala.
Esta strada sin sorti, esta coredor, esta voses… La poterna ta es situada en un strada sin sorti? E consernante me, ci ia gida mea pasos?
E, cuando la porta ia es abrida, me ia surprende me, parlante a me e demandante cua me distingui entre la sera e la note. Alora, la vose, ci ia prosimi a retro de me, ia responde en mea orea.
« Los es arbores en la campania. A supra, la sielo. »
Me no ia turna. Me ia crede ce me sonia. Nunca me ia vide ja.
Me ia recorda, alora, a un dia ante un parti. La vose ia es disente a me:
« Tu va visita me, a un dia? »
Car el ia parla a me como si me no es mera un pasor tempora. Alora me ia demanda, como si me ta crede ancora a lo, fidosa:
« Do tu abita?
— En un vileta. Un vileta vea, con un plaza vea, e arcadas vea tota sirca la plaza. En un parte, on ave un caferia. Tu va vide. On ave depintas oncida al mures. Depintas cuantiosa. »
El ia parti. Ance totas ia parti, cadun a sua parte. Nunca on ave cosa, ultra un strada sin sorti.
[A esta momento, la transmete es defetosa; un vose du, nondistinguinte, covre la prima.]
« Axiom prima: En cualce sistem axiomal, on ave sola un axiom, e sola un. »
A fronte
Paseante sur la duna, me ia demanda a me como me ia pote ariva ala — tra un instante corta, poi me no ia demanda plu otra cosa.
On ave nun. Estra un arbor dui ardeda a media del arena, un tronco de arbor mor — a ves nova un mor. On ta dise ce la vive repulsa la almas la plu ostinosa.
Ancora alga senes resta sur pasos afondante en arena. Asi, donce, es la tera do no cosa crese. E tota cui locia impulsa vive ala migi, desintegra. Tota asi putri pico a pico. Ance la tempo: lo fa como la otras, lo supini a fronte del mar e espeta. Tal me ia fa. Espetante ce la tempo mori pos un agonia longa. Per pasa lo, me ia regarda atendosa. A tal punto ce me ia reconose acel trasas de pasos cavinte la arena. On ave donce algun ci pasa, cuando la sol declina? Algun ci vive asi, do no cosa crese? Como vive sur esta finje de tera?
De arena… On no vive asi. On espeta. Espeta ci? On ave nun. On espeta, an tal. Compulsada. Lo no es vive, evidente, ma asi, on pote perde tempo. La tempo agonia, ma nun cexa.
La oscuria ia cade sur la dunas. Me sonia? On ave donce algun?
« A! Lo es tu? Tal, sin sabe lo, me ia es espetante tu? »
Un de nos du parla, ma me no susede sabe ci de nos. Asi, no cosa debe es aprendeda, en la mesma modo ce no cosa debe es portada con se, cuando on ariva. Ultra la axiomes, on ave no cosa.
« Tota es finida. La tempo ia mori pronto cuando nos ia encontra. »
Un de nos du parla, ma me no susede sabe ci de nos. La otra, pos un medita tro longa, ia comensa trema e delira. E, cuando me ia turna per dise ce, a contra, tota es comensante… no cosa resta plu.
On ia desapare.
No cosa resta plu. E denova me sta solitar. Me velia.
[Reprende.]
A ante
Denova, me retrova me. Pico plu perdeda. Frecuente, a presente, me surprende me demandante como me ia pote entra e prisoni me en esta sitadela proibida.
Un instante de siecia? Lo pare a me ce me ia surje, a un dia, sin ce me persepi vera, en un longa coredor estratempal. No, lo no ia es longa, no longa no corta. Lo ia es. Pasor ostinosa, me no ia ave pensa. On no ia ave un cuantia infinita de portes, al comensa, e la paseas en la estratempo ia es fininte con la abri de un de los. A ante, on no ia pote compara.
Un porte ia abri, e la realia ia apare a me, en un sola bloco. Me ia resta cuasi craseda su la pesa del tempo. Asta ce me trova la instante presente, la atom de realia.
La atom de la consensa del cosas: me ia vide lo. Lo sembla un gota de acua, un bola, transparente e densa. On ta debe resta en un instante per libri se de sua pesa.
On ave un flax, per un secondo, cuando la porte desapare: la oios clui.
Me vide, abrinte los, ce me es sur un via serpentin cual asende la colina laborosa. Ala, de la plu alta posible, me persepi la mar. Al otra lado, un vileta peti es como un corona sur un colineta.
No avisa, ma un malsenti nondefinable. Casas abandonada, un ruina jeneral cual consuma se… An tal, on debe trova asi un finje de vive, entre esta cosas mor — como entre la senes, sur la duna. On ave bien un plaza entre la ruinas — si! un plaza ensircada con arcadas, alga botecas, un caferia e, moldinte la mures, depintas, silente morinte.
Asi ia es la loca. Simple, me ariva tro tarda. Cisa, un epidemia ia traversa la vileta, como me traversa lo aora. La mundo ia deveni un deserta, de corta. En la caferia, me ia senta sur un seja, en la oscuria, fisante con regarda la entra, con la testa vacua.
Aora, me tremeta. Ci ia es acel mor en la sala bolin?
A pos
La instante pasa. Lo pare a me ce me ia espeta ja, en acel modo, algun ci ia veni nunca. Me leva, me avansa, evitante la tables, me ariva al entra. La brilia del sol penetra mea oios, lasante me probable abaliada. Abaliada, ma no ferida: un abalia sin dole. On senti calda, al sol.
Me ia oia. A esta ves, me es serta. La instante veni de pasa, e tota veni de cambia. Un ronrona mate, poi un auto surje a fronte de me.
« Para! Lo es me! »
Ma on no vide me. Me core denova. La auto pasa. Abaliada par la sol refletada sur me, me clama.
« Para! Lo es me! »
Ma me colpa contra jente, contra murmuras, zombis, cual pleni la stradas, ance mea testa.
« Tu no ta pote cauti? »
[La comunica desclari de ves a ves.]
Mea oios reteni la remente instante de un fas en la venta rapida del vacua.
Sola a presente me pensa comprende simultan perce la sol no ia es ferinte me e perce on no ia vide me.
Jente cria, la vileta ia desapare. Me retrova me corente en un strada de la vila infinita. Un instante veni de pasa.
Aora
Aora es la momento cuando tota fini. La note ia lisca gradal a en la casa silente. La oras lenti nonpersepable tra les vibras de un orolojo de pendulo cual perde sofla. Perce lo es sempre tan oscur en mea casa? E de do veni esta sona mate de un melodia?
Me dise a me ce la impulsa determinante va vibra pronto; lo va es la momento per evade. La mar va ajita sua flue en un ondeta e va engoli tota con dulsia.
De mea fenetra, on persepi la mar. Nunca me no ia nota… La vila intera ia migi cuasi intera. Cuando me puxa la paneles, los distanti silente e los desfisa; cada de los afonda a via… tan a via ce me deteta apena los flotante en la nonpesa.
La mar es aora a basa de la casa. Lo ensirca lo, presa lo. Nos es isolida, e no cosa resta a sirca. No cosa estra un estende licuida e corodente. Lo va es pronto mea turno.
La pendulo ia para. Me parti.
La scalera craci nel silentia. La porte de entra do me ariva sembla la porte de un catedral. Me nesesa sorti de asi. La masa abri e clui.
Nun en la vila. Sola me e la ruido de mea pasos. La pluve comensa cade, como volente veli mea via en la oscuria.
Me ia escuta, me ia regarda con atende. En la nebla, a via, me ia divina un forma movente, e la luseta debil de un lanterna. Me ia segue la lus.
[Crepitas subita. Un cria agu e metal. Un interompe momental, poi lo reprende.]
Me no ia nota ce me ia traversa ja la vila. Paseante multe rapida, me ateni la mar, me pasa un peti porto de pexores, oscur e silente, me segue la via cual borda la tera. Me ariva a la dunas.
U ala. Lo es asi, aora. En pasa, me senti ce me no va pote vade plu distante.
Me cade sin an ateni la tera.
A no loca
Un ambiente strana, blancin, un coredor cual turna spiralinte. La bola apena videda: vacua, a esta ves. Me avansa en la otra dirije, me distanti de la sentro, traeda multe rapida, en un aselera estrema, acompaniada subita con un avertador agu sibilante, un tumulta, un ajita furiosa. Un panica nonrazonada saisi me.
La porte abri!
Me core e desende la poca grados cual gida al jardin. La casa de la strada sin sorti distanti a retro de me. Projetada en la rueta de tera, en un ruido de core rapida e de crias confusa aselerante, apena me ia nota ce lo es la matina e ce la jardin es merveliosa, con sua arbores, sur tera inondada con lus. Me turna mea testa a mea seguores.
Alora, alga cosa noncredable aveni. La silentia la plu completa implode en mea oreas. Nun en la parce no en la rueta; distante, la construi grande e blanca, como un sitadela proibida. E la porton clui sur esta vacua, subita.
No cosa otra ca un panel peti: silentia. De alora, la silentia cade ance sur la campania. Me parti tra la campos.
[Un transmete plu e plu difisil. Interferes cuantiosa.]
Un rieta peti flue, nondistante. Me segue lo.
Me ariva aora en vista de un spesie de ponte. Un sola arco. Lo es estracomun: me oia algun parlante. La vose veni de la acua, su la arco mesma. Esce lo es mea vose? Me inclina sur la acua. Me regarda tra lo. A ultra, lo es como un nebla. A interna, me distingui nonclar la forma de algun pendulinte lenta un lanterna cui luseta debil susede veni asta me.
« Pos cuando pasada, la arco va apare como un arcada de la plaza peti cual tu xerca. La arco es la poterna. »
La arco es la poterna!
[Para brusca de la comunica. A esta ves, concluinte.]
Nunca
A alga dia, me va nesesa parti en xerca del Emetador. Me ia nota detaliosa la curso, gradal cuando lo ia es transmeteda a me. Ma como reconstrui la momentos perdeda en la crepitas, la interferes, la suprapones de frecuentias esterna?
De cuando tu ia desapare, tu gusta solitar la comprende total.
Me — e per longa a pos — ancora no comprende cosa.