3: Ascondeda ma clar vidable
Lo es difisil per sabe esce la antas es un nasion, un relijio, un asosia secreta o un misca de tota la tre. Parente, los abita en la Isolas Brites tra ja mil anios a la min, e on crede ce entre des e dudes mil de los esiste, sperdeda tra la popla restante e completa nondistinguable de los.
Los es ance la produida de la imajina de John Fisher, un spesialiste academial de computadores, ci ia mori en 2007. En sua pajeria engles, aora asedable sola en forma arcivida, el descrive los como avente un re e un rea, sua propre relijio, e un strutur sosial organizada en grupos peti (o cay) con no plu ca dudes persones en cada.
La antas pertine a esta serie de blog car los ave ance sua propre lingua multe strana, nomida Elet Anta “lingua anta”.
Fisher documenti esta con rigor notable, disente ce el fa no plu ca comunica sabes cual el ia estrae de la fratos survivente de du libros vea, Horca Cyneeth “Scema gramatical” e Tolonald Elet Antaa “Disionario de la lingua anta”, aidada par alga contatadas anonim en la comunia anta mesma. Me no nesesa esplica ce tota la informa es vera sua propre inventa.
La lingua es nonindoeuropean, an si un pico de parolas pare ave radises indoeuropean:
isc “pex”
alyi “alio”
an “un” (numero)
En ajunta, lo pare ce la antas ia empresta de la engleses un cuantia peti de termas en sua coabita tra sentenios en Britan:
motato potato “patata”
fut foot “pede” (mesura de longia)
fayl file “fix” (de computador)
La ortografia es simple e coerente, con asepeta pico cimrica. On spele la sona k como c; la letera k es reservada per la sona deutx de ch, como en Bach. Sinco sonas es scriveda como digrames con h: ch e sh coresponde a tx e x en elefen, th es un sona interdental como en thin en engles, lh sona como ll en la parola cimrica llan, e rh es un r nonvosida. Lh e rh es rara, aparente en min ca 20 parolas, combinada.
On ave sete vocales. A, e, i, o e u ave sua valuas tipal european, con ce oe es la sona oiada en la parola franses yeux e y sona como la u franses o la ü deutx. Y funsiona ance como consonante, con la sona elefen de i en ia, cuando lo es visina a un vocal. A veses, la spele dupli un vocal (como en cyneeth a supra) per indica un pronunsia longida e simultan asentuada. La asentua en otra casos es a la vocal anteultima (tolonald “disionario”) o a la vocal tre ante la fini cuando la du ultimas es visina a lunlotra (asanial “dansor”).
Fisher dise ce Elet Anta ave sua propre alfabeta tradisional, la Voronye Tacald o “Leteras Vea”, veninte de minima otosento anios pasada e profonda revisada par la Consilio Lingual (Curthas Eleccwaa) en la dui du de la sentenio des-nove, ma parente pico usada pos la Gera Mundal Du. Triste nos reseta no plu detalias, estra un comenta pasante en la disionario ce la vocales longida ia es orijinal indicada par pone un punto supra los.
La pajes de Fisher refere a la Curthas Eleccwaa a veses variosa, jeneral como un academia de gramaticistes vea e polvosa ci cexeta contra:
doroshye la-cawl-blavadsu anty’ eliany’ eleccwaye salaythsuu
“la putri intera e orible de la belia de nosa lingua santa”
Ta ce nos despaci esta sintagma per saborea pico como sua lingua santa funsiona en efeto.
Dorosh es un verbo, con la sinifia “es multe nonplasente”. Interesante, la vocabulo anta conteni tota no radises ajetival. Un pensa como “la can es vea” es espresada con un verbo de state:
gorof voron
“can vea-es”
Par la ajunta de -ye (a veses -y’ o sola -y), un verbo entra a lo cual Fisher nomi la forma “atributiva”, cual es alga simil a un partisipio en elefen:
voronye gorof
“vea-esente can”
pd. “(la/un) can vea”
Tal, doroshye es la ajetivo “(esente) orible”.
Nosa parola seguente es la-cawl-blavadsu “putri intera”. Blavad es la verbo “es putrida”. Afin lo sinifia “putri, deveni putrida”, on ajunta la paroleta cawl “deveni”. La es un plu paroleta, cual sinifia “completa, asta la fini”, donce la verbo la cawl blavad sinifa “putri intera, asta cuando no parte resta”.
La -su a la fini de blavadsu es un sufisa par cual on deriva un nom per la ata de un verbo – en esta caso, la ata de “putri”.
La cosa fasinante con la sufisas derival en anta es ce tota de los es formas truncada de sustantivos. Tal, avicwa “fem” e arecwa “om” furni la sufisas -avi “fema” e -are “mas”:
brath “cavalo”
brathavi “cavalo fema”
brathare “cavalo mas”
Aldwa “colie completa” simpli a -ald:
tolon “parola”
tolonald “disionario”
E eleccwa “lingua” deveni la sufisa -elet en la parola Antelet, cual es un otra nom per la lingua de la antas.
Perce la forma plen de tota esta sustantivos ave plu o min la mesma coda, -(c)wa? Lo pare ce la sufisas ia veni prima, e ce esta coda ia es ajuntada a un tempo plu tarda en la istoria de la lingua per dona un modo de construi sustantivos cual ta catura la esense de la sinifias de la sufisas. Ma ci sabe? Fisher nomi los cwe-nakttolon “sustantivos Q” par causa de la similia entre -cwa e cwe (la nom de la letera Q), an si Q no esiste en la alfabeta anta!
On usa sustantivos Q truncada en alga otra modos. Importante, los es pronomes: are e avi sinifia “elo” e “ela”. Plu, los es ance usable como pronomes de la persones prima e du, per asentua la jenero de la parlor o de la person a ci el parla. Un cosa simil aveni con in “me” (de incwa “parlor, mesajor”) e et “tu” (de eccwa “atestor”) – si on ta escuta un presenta e ta vole interompe, on ta nomi se et e la parlor in. Multe confondente per stranjeres!
Un modo tre de usa un sustantivo Q truncada es como la clasinte de un nom propre, como en:
Rin Tamis “Rio Thames” (de rincwa “rieta”)
Carc Lutes “Paris” (carcwa “castel”)
Von Coemri “Cimri” (vondwa “pais”)
Elet Coemri “la lingua cimrica”
Amil Shon “Sr John” (amilcwa “senior”)
Amil e sua corespondente fema athal servi ance como pronomes respetosa. En fato, alga notable, on pote usa cualce sustantivo Q truncada como pronom per indica la sustantivo presedente con acel sufisa. Tal, en discute un disionario, ald ta pote refere a tolonald, e su ta sinifia cisa doroshye la-cawl-blavadsu “putri intera”.
Esta reenvia nos a nosa esemplo de sintagma, de cual sua resta es aora relativa fasil per analise: anty’ eliany’ eleccwaye salaythsuu. Ant “nos antas” es la forma truncada de la sustantivo Q antwa “la popla anta”, e antye sinifia mera “nosa” con acel conota. Elian es la verbo “es santa”. Eleccwaye es la forma ajetival de eleccwa “lingua”. E salaythsu es la sustantivo nominte la ata de la verbo salayth “es bela” – donce lo sinifia “belia”.
Ajetivos cuali la sustantivo la plu prosima cual segue – ma, strana, eleccwaye, an si sua sinifia es ajetival, es regardada par esta regula como un sustantivo, an tal. (Fisher nomi lo un sustantivo en la forma atributiva.) Tal, e antye e elianye descrive eleccwa (“nosa lingua santa”) e en efeto la -ye de eleccwaye es ajuntada a acel tre parolas como un grupo, cual descrive alora salaythsu:
{antye elianye eleccwa}–ye salaythsu
“{nosa lingua santa}–sua belia”
Si tua propre interesa no ia putri intera, cisa tu vole sabe perce la u de salaythsuu es duplida. Esta es car acel sustantivo es en un caso nomida “definitiva”, de cual un de sua usas es per marca la sujeto de un sustantivo acompaniante cual es derivada de un verbo nontransitiva – en esta esemplo blavadsu “putri”. On trova la definitiva ance en nomes propre e titulos como Horca Cyneeth “Scema de gramatica”, cuando la parola prima no es un sustantivo Q truncada. Elefen tende usa un preposada en tal situas: “la putri de la belia”.
Esta gida me a la ultima de la cosas nonusual en la gramatica anta cual me desira mostra: la lingua conteni zero preposadas. En loca, lo ave cuasi sincodes parolas spesial cual o sta separada – con sinifias como “es a retro de” o “es par causa de” – o es sufisada a sustantivos per espresa sinifias simil a preposadas.
Per esemplo, ursa sinifia “es su”, bald es “table”, e baldursa sinifia “es su un table”:
gorof baldursa
“can table-su-es”
pd. “la can es su la table”
baldursay gorof
“table-su-esente can”
pd. “la can su la table”
La verbos sufisal es ance usada per crea parolas simil a sujuntas, per dise: averbos cual junta frases e suproposas. Tal como la ajetivos fini con -ye, -y’ o -y, tal la averbos fini con -wa, -w’ o -w:
gorofye gawfsu brano
“can-al abaia ruidosa-es”
pd. “la abaia de la can es ruidosa”
gorof gawf branowa
“(la) can abaia ruidosa”
gorof sendi baldursaw
“can dormi table-su-esente”
pd. “la can dormi su la table”
Ya es un pronom spesial cual refere a la intera de la proposa visina. Lo es comun egal a la sujunta ce de elefen. Asi es un esemplo prendeda de un de la fables de Esopo:
Hishesoy Brufa calti ya, Sar sof varad
“Norde Venta aseta ce, Sol plu forte-es”
Ma – tan salaythwa! – esta parola ya atrae felis la verbos sufisal. Asi es du plu esemplos en la fable, usante irto “es sur, es a tema de” e afga “es pos”:
Sar tal Hishesoy Brufa sharvat yirtow, cren sof varad
“Sol e Norde Venta disputa lo-sur-esente, ci plu fort-es”
pd. “… a tema de ci es la plu forte”
yafgaw Hishesoy Brufa ufatharn
“lo-pos, Norde Venta sofla”
pd. “a pos, …”
“La venta norde e la sol” es sola un de plu ca des testos anta cual Fisher presenta e esplica en sua pajeria, incluinte un tradui stonante de des-sinco linias de la Comedia Divin par Dante a esametres. Si on xerca en la arcivos de la Grupo Epostal per Linguas Construida, on pote descovre un bon cuantia de otras de entre 1998 e 2000.
La pajeria conteni ance la sinco lesones prima de un curso cual, triste, Fisher ia fini nunca scrive, con ance un disionario impresante completa, ofrente plu ca 2500 radises con alga miles de derivadas e esemplos abundante.
Lo es clar ce el ia pasa multe tempo en eleje parolas cual sona conveninte a sua sinifia. Como gorof “can” e brath “cavalo”, multe animales ave nomes onomatopeal:
orongc “porco”
brarc “rana”
tuburubu “pavo”
Parolas como
tulp “marteli”
yich “grinse, pipi”
faf “suspira”
es vera deletosa, como ance:
mifmof “esita”
linlan “compara”
liplop “jelatin”
Otras es min evidente simbolin, ma pare ancora multe credable:
brement “esije”
pustas “tropeza”
shazdi “es majiosa”
toshpoc “es fea”
Un de mea favoredas es la terma jeneral per un avia grande, cual es marf. Avias plu peti es nomida tanlir, laxe relatada a la verbo tanlin “canta”. Multe tal relatas interna etimolojial es trovable en la vocabulo:
lawna “senti nostaljia, es triste sin”
lawan “es conservaliste”
andal “fas”
andac “orolojo”
ufath “respira”
brufa “venta”
La introdui de la pajeria considera corta la “idea riable” ce cisa la antas usa un capasia majiosa de alga spesie per asconde se de la resta de la popla brites. Tal o no, serta sua lingua ia asconde se a grado profonda pos la mori de John Fisher.
Esta es regretable, car Elet Anta es un obra briliante e fasinante, e me opina ce lo merita es plu bon recordada. Esperable par esta article lo va deveni, an si mera pico, plu conoseda.