Leges de Murphy
Un colie de comentas sur la frecuentia surprendente de avenis nonoportun, espresada como si los ta es leges de fisica.
Traduida par Simon Davies
La lege de Murphy
- Si un cosa pote vade mal, lo vade mal.
- No taxe es tan fasil como lo pare.
- Cada taxe ocupa plu tempo ca on espeta.
- Cuando un cosa pote vade mal en plu ca un modo, lo vade mal en la modo la plu danante.
- Si on nota ce un cosa pote vade mal en cuatro modos, e on evade estas, un modo sinco apare pronto.
- Sin coreti, la cosas deveni sempre plu mal.
- Sempre cuando on intende fa un taxe, on nesesa fa un otra taxe a ante.
- Cada solve jenera problemes.
- On no pote crea un cosa secur contra bobos, car bobos es tan injeniosa.
- La natur alia se con la problem ascondeda.
- La natur es la diablo.
Comentas de O’Toole sur la lege de Murphy
- Murphy ia es un otimiste.
La filosofia de Murphy
- Surie, car doman va es plu mal.
La constante de Murphy
- Un cosa es danada en proportio direta con sua valua.
Revisa de la lege de Murphy per cuantia
- Tota vade mal a la mesma tempo.
La eseta sete de Zymurgy sur la lege de Murphy
- Cada pluve es un pluvon.
La sujesta de Boling
- Cuando tu senti bon, no es ansiosa. La senti va pasa.
La lege de Iles
- Un modo plu fasil esiste sempre.
- Ma on no pote vide el cuando on regarda la modo vea, spesial per periodos longa.
La leges de Chisholm
- Cuando un cosa vade bon, un parte va vade mal.
- Cuando on no pote imajina ce un cosa va vade plu mal, lo vade plu mal.
- Si un cosa pare vade plu bon, donce on ia iniora un parte.
- Cada proposa es malcomprendeda par los ci va judi lo.
- Si on esplica tan clar ce nun pote malcomprende, alora algun va malcomprende.
- Si on fa un ata, serta ce cadun va aproba lo, alora algun va desaproba.
La leges de Scott
- An cuando un cosa vade mal, lo pare frecuente ce lo vade bon.
- Cuando on ia persepi e coreti un era, on trova ce lo no ia es un era.
- A pos, on no pote desfa la malcoreti.
La leges de Finagle
- Si un esperimenta susede, alora lo ia vade mal.
- Per cualce resulta espetada de un esperimenta, algun va malinterprete lo, falsi lo, o crede ce lo ilustra sua teoria personal.
- En cualce colie de datos, la peso la plu evidente coreta es la era.
- Si on demanda ce otra persones xerca la era, los no vide lo.
- Cuando un person nonespetada ariva, el vide instante la era.
- Cuando on ia malfa un taxe, cada atenta de boni lo causa ce lo deveni plu mal.
- Per studia bon un tema, comprende lo ante cuando tu comensa.
- Esperimentas debe es reproduable – los debe fali sempre en la mesma modo.
- No crede a miracles – depende de los.
La axiom de Wingo
- On pote evade la leges de Finagle si on aprende la arte simple de nonpensa.
La lege de Gumperson
- La probablia ce un cosa va aveni es en proportio inversada con sua desirablia.
La lege de progresa de Issawi
- Un via rapida es la distantia la plu longa entre du puntos.
La leges de Sodd
- Sempre cuando un person atenta un taxe, el es impedida par la interveni nonconsensa de un otra person o cosa. An tal, on pote completi alga taxes, car la intervenor atenta ance un taxe e el mesma es impedida.
- On no pote evade ce, pronto o plu tarda, la caso la plu mal va aveni.
- On ta desinia cada sistem per tolera la caso la plu mal.
La lege de Simon
- A un tempo o un otra, tota cual on ia construi va cade en pesos.
La lege de Rudin
- Cuando la persones eleje entre reatas posible en un crise, la plu persones eleje la reata la plu mal.
La teorem de Ginsberg
- On no pote gania.
- On no pote egali.
- On no pote an abandona la jua.
La comentas de Freeman sur la teorem de Ginsberg
- Cada filosofia major, cual atenta ajunta plu sinifia a la vive, es fundida sur la nega de un parte de la teorem de Ginsberg:
- La capitalisme es fundida sur la suposa ce on pote gania.
- La sosialisme es fundida sur la suposa ce on pote egali.
- La misticisme es fundida sur la suposa ce on pote abandona la jua.
La comentas de Ehrman
- La cosas va mali ante cuando los va boni.
- Ci ia dise ce la cosas va boni?
La lege de Murphy sur termodinamica
- La cosas mali su presa.
La lege de Commoner sur ecolojia
- La cosas desapare nunca.
La lege de Pudder
- Tota cual comensa bon fini mal.
- Tota cual comensa mal fini plu mal.
La teorem de Stockmayer
- Si un cosa pare fasil, lo es difisil.
- Si un cosa pare difisil, lo es cuasi nonposible.
La lege de Howe
- Cadun ave un scema cual no pote susede.
La lege de Sturgeon
- 90% de tota es caca.
La lege nondisable
- Direta cuando on refere a un cosa:
- Si lo es bon, lo parti.
- Si lo es mal, lo aveni.
Leges nonsimetre de espeta
- Espetas negativa dona resultas negativa.
- Espetas positiva dona resultas negativa.
La lege de Hofstadter
- Cada taxe ocupa plu tempo ca on espeta, an cuando on recorda la lege de Hofstadter.
La leges de Klipstein
- Cada aplica per un patenta es presededa par un aplica simil fada par un laboror nonrelatada.
- La sertia de un data per completi un taxe es en proportio inversada con la importa de la sertia.
- Cuando on corti un filo a la longia nesesada, lo es tro corta.
- Cuando un projeta nesesa N partes, sola N-1 partes es trovable.
- La parte secur contra fali destrui la otra partes.
- Un strumento comprada sasia sua spesifias sola asta cuando on ia esamina lo per falis.
- Cuando on ia estrae tota vises cual clui un panel de un macina, on trova ce on no ia abri la panel nesesada.
- Cuando on ia refisa tota vises de un panel, on trova ce on ia oblida repone un peso importante.
- Cuando on ia asembla un strumento, on trova ancora alga partes sur la table.
Leges universal per injeniores naive
- Si un era pote apare en un calcula, lo apare.
- Cada malcalcula es tal ce lo causa la plu dana.
- Si plu ca un person es culpable per un malcalcula, nun es culpada.
- La constantes en un formula funsiona como variables.
- La dimension la plu importante sur cualce desinia tecnical es probable ometeda.
- Si la model ia funsiona perfeta, tota produidas real va fali.
- On nesesa sempre fa cambias major a la desinia de un sistem cuando lo es cuasi completida.
- On no pote intercambia partes intercambiable.
- Un mesura de rapidia furnida par un fabricor nesesa es divideda par du.
- Un mesura de rapidia furnida par un vendor nesesa es divideda par cuatro.
- La parte cual on nesesa repara o cambia es la parte la min asedable.
- La garantia per un produida es canselada par la paia de la fatura.
La ajunta de Atwood
- Tu no va perde la libros cual tu presta a un otra person, estra los cual tu desira vera regania.
La lege de Johnson
- Cuando tu no reseta un numero de un jornal, lo es la numero cual conteni la article o nara cual tu ia desira vera lege.
- E tota tu amis no reseta lo ance, o ia perde lo, o ia baldoni lo.
La lege de Harper
- On trova nunca un ojeto perdeda asta cuando on ia compra un nova.
La regulas simetre de Richard sur la posese
- Si on reteni un cosa per un tempo sufisinte longa, on pote baldoni lo.
- Si on baldoni un cosa, on nesesa lo instante.
La lege de Glatum sur la materialisme
- La usosia persepida de un cosa es en proportio inversada con sua usosia real pos compra.
La lege de Lewis
- Pos compra un cosa, on trova ce lo es plu barata en un otra boteca.
La leges de la jardin
- La utiles de otra persones funsiona sola en la jardines de otra persones.
- Utiles sofisticada no funsiona.
- On ave masima la cosa cual on nesesa minima.
La lege de transporta publica
- Cuando on intende cambia entre du veculos, e la veculo prima es tarda, la veculo du es sempre puntual.
La lege de la bisicle
- En cualce dirije, on vade a supra e contra la venta.
La regula de frustra par gatos
- Cuando tua gato ia adormi sur tua jenos e aspeta tota contente e adorable, tu nesesa subita visita la saleta privata.
La lege de Kitman
- En televisa, la programes multe bobo tende apare en loca de la programes alga bobo.
La lege de Johnson e Laird
- Un dole de dente tende comensa en la sera de saturdi.
La oserva de Etorre
- La otra filo de persones avansa plu rapida.
La lege de Boob
- On trova sempre un cosa perdeda en la loca final do on xerca.