Varia ≠ variosa

Varia es un verbo, fundal nontransitiva, indicante ce un cosa cambia tra sua esiste, o ce la composantes de un grupo es diferente de lunlotra:

• Mea cortesia varia con mea umor.

Comprendable, on pote dona a lo un ojeto transitiva, corespondente a la sujeto nontransitiva:

• Me varia la custa de cliente a cliente.

E on pote usa varia como un nom:

• La varia entre la resultas ia disturba la siensistes.

Ma on debe evita usa varia per dise variosa o diversa:

• Los ia consulta libros variosa sin trova un esplica.

Cuando on fa esta era, varia tende mostra sua fas ante la nom, como si lo ta es un determinante simil a multe. Ma variosa e diversa es mera ajetivos comun, e los segue la nom.