Se ≠ se mesma

Cuando on ajunta la parola mesma pos un nom o pronom, la efeto es un asentua forte a la identia de acel person o cosa. On declara ce on refere vera a acel person o cosa e a no otra, cisa con un tinje de surprende:

• La pape mesma ia emerje de mea cosina.
  • (Me no ia espeta vide ala el.)
• Cuando me es coler, me sembla la diablo mesma.
  • (Me asentua la esajera.)
• En la media mesma de la sposi, la prete ia stornui.
  • (Vera en la media, a un loca profonda en la rituo.)
• Me mesma ia scrive la plu de la articles en la revisteta.
  • (Cisa me es la editor, e me cexa sur un manca de contribuis.)

En alga linguas, on ave no distingui clar entre esta e la pronomes refletante. En engles, per esemplo, on dise you yourself hate avocados e you wash yourself every morning, con la mesma parola yourself en ambos. Ma elefen distingui los:

• Asentuante:
  • Tu mesma odia avocados.
• Refletante:
  • Tu lava tu a cada matina.
  • Me va envia a me un carta postal.
  • El regarda se en la miror.

Si on dise me mesma, tu mesma, se mesma en la tre esemplos ultima, on no fa un era gramatical, ma probable on crea un efeto plu forte ca on intende.

• Tu lava tu sinifia tu lava tua corpo.
• Tu lava tu mesma sinifia tu lava tua propre corpo (cisa per reproxa un person ci ia sujesta ce el ta lava la corpo de un otra person).

Un plu esemplo de la bon usa de mesma es:

• El parla tan complicada ce el confusa se mesma.
  • (El confusa no sola la persones a ci el parla, ma ance an se!)