Junta

Junta es un verbo, e es fundal nontransitiva. Lo sinifia “deveni liada o unida”, e sua sujeto es tipal plural:

• Esta du stradas junta en la sentro de la vila.
  • (Los encontra lunlotra.)
• Me demanda ce vos junta (con me) en brinda la sposes nova!
  • (Tota la persones presente va ata como un grupo unida.)

Si on ajunta un ojeto direta, esta es egal a la sujeto nontransitiva:

• Un ponte supra un foso junta la du alas de la castel.
  • (La du alas es liada par la ponte.)
• Un senti de aminia junta tota la comunia.
  • (La comunia junta – o es juntada – par esta senti.)

Un era comun es la usa de esta verbo transitiva per dise “deveni un membro de”:

• Me va junta nunca tua club asurda.

Per parla coreta, dise la seguente:

• Me va junta nunca me a (o con) tua club asurda.
  • (Me e tua club va deveni nunca un cosa unida.)

Junta es ance la nom de la ata de junta, o de la noda o fusa simil cual resulta de la ata. (Per gramaticistes, lo es ance la nom de un clase de paroletas cual lia du partes de un frase.)

No un averbo

Un era strana, ma surprendente comun, es la usa de junta como un averbo, en loca de en junta o juntada:

• La cuatro amis ia pasea en junta a la botecas.
  • (Los ia vade ala como un grupo unida.)
• Aora, ta ce nos brinda juntada la sposes nova!
  • (Tota de nos va fa esta saluta a la mesma tempo.)