En cuando ≠ an si

Si on tradui tro leteral de engles a elefen, un de la trapas en cual on risca cade relata a la parola while.

En multe casos, while ave un sinifia tempal. Lo indica ce un ata aveni a la mesma tempo como un otra. En elefen, on espresa esta con en cuando, o tra cuando si on vole asentua ce un ata ocupa de la tempo intera de la otra. Ambos sinifia cuando, ma en modo plu spesifiante:

• La casa ia es colpada par lampo en cuando me ia dormi.
• En cuando tu ia reposa sur la plaia, me ia es laborante.
• Lo ia pluve tra cuando me ia bisicli.
• Tra cuando tu es un studiante, tu pote abita asi.

While ave un otra sinifia, espresada con an si en elefen:

• An si la lago no es profonda, lo es ancora perilosa.
• Esta libro, an si interesante, no es multe bon scriveda.
• An si me amira tua coraje, a veses on fa plu bon par no envolve se.

La sinifia forte tempal de en cuando ta crea un efeto bizara en la frases de esta spesie du.

En alga casos, while sinifia apena plu ca e o ma:

• Mea amis ia porta xapetas, e me ia ave un sueter de capeta.