Simon | Re : [LFN] Re: Vici nova de elefen

• Autor: Simon (“simon.franova”)
• Tema: Re : [LFN] Re: Vici nova de elefen
• Data: 2010-10-26 15:34
• Mesaje: 3185 (a supra, presedente, seguente)

Patric,

> Cuando me clica la boton "edit" la pajina no abri...

Ma me suposa ce tu no resta a la paje orijinal. Alga cosa aveni, ma tu
vide final sola un paje cuasi vacua, en loca de la testo editable. Si?

Si acel es la situa, la problem es cisa causada par un combina de tu
surfador e la editador "rica" de Wikia. (Me no gusta la editador rica!)

Me usa Mozilla Firefox. Si me retira me (log out) de la vici e deveni
un usor anonim, cuando me clica alora "Edit", me vide la editador rica
(con se baras de utiles), ma el es intera vacua. Ma si me fa la mesma
en Google Chrome, tota opera bon. Cual surfador tu usa?

Si esta es tu problem, cisa tu pote usa un otra surfador.

Un solve plu bon es abandona la editador rica e usa la editador simple
en loca. Ma per fa acel, tu nesesa ajusta tu preferes, e tu pote fa
esta sola si tu identifia tu (log in) a la vici. Me ia nota ce tota tu
contribuis resente a la vici (ante la aspeta nova) ia es anonim - tu no
ia identifia tu.

Donce me recomenda ce tu proba esta metodo:

1. Clica "Log In" a la comensa de cualce paje.
2. Tape tu nom de usor e tu parola secreta.
3. Eleje "Remember my login on this computer". (En esta modo tu no
   nesesa reidentifia tu sempre cuando tu visita la vici.)
4. Flota tu mus supra tu nom de usor (cual es aora do "Log In" ia es)
   asta cuando un menu peti apare. En esta menu, clica "Preferences".
5. En la paje de preferes, clica "Editing".
6. Deseleje "Enable Rich Text Editing".
7. Final, clica la boton "Save" su la lista de elejes.
8. Proba denova cambia un paje.

Simon