RELIJIO

La libro de Enos

Enos prea con zelo, e oteni la remete de se pecas – La vose de la Senior penetra se mente, e promete la salva per la lamanistes en un dia futur – La nefistes atenta restora la lamanistes – Enos joia en se Remetor. Sirca 420 aec.

  1. Vide, ia aveni ce me, Enos, ia sabe ce me padre es un om justa, car el ia instrui me sur se lingua e sur la disiplina e reproxa de la Senior – e la nom de me Dio ta es bondiseda per esta.
  2. E me va informa vos sur la luta cual me ia ave ante Dio, ante reseta la remete de me pecas.
  3. Regarda, me ia vade per xasa bestas en la forestas; e la parolas cual me ia oia me padre parla frecuente, consernante la vive eterna e la joia de la santas, ia afonda profonda en me cor.
  4. E me spirito ia fami; e me ia ajena ante me Creor, e me ia cria a el en prea forte e en mendica per me spirito propre; e me ia cria a El tra tota la dia; si, e cuando la note ia veni, me ia leva ancora tan alta me vose ce el ia ateni la sielos.
  5. E un vose ia veni a me, disente: Enos, tu pecas es pardonada, e tu va es bondiseda.
  6. E me, Enos, ia sabe ce Dio no pote menti; e donce me culpablia ia es brosida a via.
  7. E me ia dise: Senior, como esta es fada?
  8. E El ia dise a me: Per la tu fida en Cristo, ci tu ia oia e vide nunca a ante. E multe anios va pasa ante cuando El va mostra se en carne; donce, vade, la tu fida ia salva tu.
  9. Aora, ia aveni ce, cuando me ia oia esta parolas, me ia comensa senti un desira per la bonstate de me frates, la nefistes; donce me ia versa me spirito intera a Dio per los.
  10. E an cuando me ia luta en me spirito en esta modo, vide, la vose de la Senior ia penetra denova me mente, disente: Me va visita tu frates seguente se asiduia de segue me comandas. Me ia dona esta tera a los, e el es un tera santa; e me no maldise el estra par causa de nonmoralia; donce me va visita tu frates como me ia dise; e me va fa se pecas desende con tristia sur se testas propre.
  11. E pos cuando me, Enos, ia oia esta parolas, la me fida en la Senior ia comensa es nonrompable; e me ia prea a El con multe lutas longa per me frates, la lamanistes.
  12. E ia aveni ce, pos cuando me ia prea e labora con tota asiduia, la Senior ia dise a me: me va dona a tu seguente tu desira, par causa de tu fida.
  13. E vide aora, esta ia es la desira cual me ia vole de El – ce si ta aveni ce me popla, la nefistes, ta cade en peca e deveni destruida en cualce modo, e ce la lamanistes no ta deveni destruida, alora la Senior Dio ta conserva un arcivo de me popla, la nefistes; an si ta aveni tal par la potia de se braso santa, afin el ta es produida a alga dia futur per la lamanistes, afin los ta es cisa salvada.
  14. Car, a esta tempo, nos lutas per restora los a la fida vera ia es futil. E los ia jura en se coleria ce, si esta ta es posible, los ta destrui nos arcivos e nos, e ance tota la tradisiones de nos padres.
  15. Donce, sabente ce la Senior Dio pote conserva nos arcivos, me ia cria continuante a el, car el ia dise a me: Vos va reseta cualce cosa cual tu demanda, si vos crede en la nom de Cristo ce vos va reseta el.
  16. E me ia ave la fida, e me ia cria a Dio ce El ta conserva la arcivos; e El ia fa un acorda con me ce El va produi los per la lamanistes a se bon tempo.
  17. E me, Enos, ia sabe ce esta ta segue la acorda cual El ia fa; donce me spirito ia reposa.
  18. E la Senior ia dise a me: Tu padres ia esije de me ance esta cosa; e el va es donada a los seguente se fida; car se fida ia es como la tu fida.
  19. E ia aveni ce me, Enos, ia vade entre la popla de Nefi, predisente la cosas veninte e atestante la cosas cual me ia oia e vide.
  20. E me atesta ce la popla de Nefi ia xerca asidua la restora de la lamanistes a la fida vera en Dio. Ma nos laboras ia es futil; car la odia de los ia es fisada, e, gidada par se natura malvolente, los ia deveni savaje, e feros, car los ia deveni un popla side per sangue, plen de idoli e mugre, nurinte se de bestas de preda; abitante en tendas e vagante en la deserto con un sintur corta de pel sirca se taies e con se testas rasada; e se capasia ia es con la arco, e con la spada curva, e con la axa. E multe de los ia come no cosa estra la carne cru; e los ia atenta constante destrui nos.
  21. E ia aveni ce la popla de Nefi ia cultiva la tera, e ia cultiva tota spesies de gran, e de fruta, e manadas de bestas, e manadas de tota spesies de boves, e capras, e capras savaje, e ance multe cavalos.
  22. E ia ave vera multe profetas entre nos. E la popla ia es un popla ostinos e difisil per comprende.
  23. E ia ave no cosa estra la severia suprapasante, la predica e predise de geras, e lutas, e destruis, e la recorda constante de la mori, e la longia de la eternia, e la judis e la potia de Dio, e tota esta cosas – la ajita sempre de los per fa ce los teme ancora la Senior. Me dise ce ia ave no cosa estra estas, e un comunia suprapasante de modo de parla, cual ta pote impedi ce los ta desende rapida a la destrui. E en esta modo me scrive sur los.
  24. E me ia vide geras entre la nefistes e la lamanistes en la curso de me dias.
  25. E ia aveni ce me ia comensa senese, e sento setedes-nove anios ia pasa de la tempo en cual nos padre Lehi ia parti de Jerusalem.
  26. E me ia vide ce me debe desende pronto a me tomba, influeda par la potia de Dio per predica e predise a esta popla e declara la dise seguente la vera cual es en Cristo; e me ia declara esta tra tota me dias, e me ia joia en esta supra acel de la mundo.
  27. E me va vade pronto a la loca de me reposa, cual es con me Remetor, car me sabe ce en El me va reposa. E me joia en la dia cuando me mortalia va vesti se con nonmortalia, e me va sta ante El; alora me va vide se fas con plaser e el va dise a me: Tu, la bonsideda, ta veni a me; ave un loca per tu en la casones de me Padre. Amen.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 31 otobre 2021 (11:25 UTC).